Poeta di Patria 2022


E piesa di Encanto

1. Baranca a composita

Biento a aregla

Lama a harmonisa

Aruba: e piesa di encanto.


2. Su solo ta mane ritm’i tumba

E ta keinta sanger den curpa

Cu zjeito bo ta sigui marcha

Ni sumpiña di wanglo lo pone bo cococha.


3. Den su aire bo ta encontra

Un brisa cu riba ritmo di wals ta caricia

Su frescura ta su ternura

Ay, esta dushi e ta.


4. Or’e cruz t’abou

Y bida pone nos tambalia

Mane ritm’i mazurka, tur wayanga

Nos hendenan ta persevera.


5. Aruba, b’a laga mi babuca

Ora baranca a wordo sacudi

Hopi di su yiunan a sclama

Con awo mi t’ey cuminsa!?


6. Patria a contesta:

Si seida ta alivia bringamosa

Nos tambe ta lanta despues di bofta

Bo resilencia tin mi asombra.


7. Un biaha mas, Aruba a’firma

Continuamente enfatisa

♫no tin nada pa kibr’e ♫

Nos isla: un sinfonia di energia.


8. Aruba, dushi tera

Di bo mi ta namora

Bo silueta den mi memoria bon graba

Mi isla: piesa di encanto.


Marilis LM Becker


 

Mi kier ta


Mi kier ta, manera Aruba mi kier ta, chikito, simpel, pero respeta, fuente di beyesa.

Mi kier ta, simbolo di identidad, biento bailando un dushi wals hunto cu nos Bandera.

Mi kier ta, chuchubi, shoco y trupial, yuwana, lagadishi den cura, transhi y trankera.

Mi kier ta, mucha cu ta sinti libera, gosando riba caya y lama, sin miedo ni problema.


Mi kier t’e cunukero sembrando speransa, ekilibrio y balansa, plantashi purifica.

Mi kier ta fruta fresco, cosecha y alimento, pan y tur sustento riba mesa bendiciona.

Mi kier t’e sabana, tur aroma y fragancia, mat’i kibrahacha, sodo di cunucu perfuma.

Mi kier t’e paisahe, bo cielo fascinante, amante y studiante cu kier conoce bo mas.


Mi kier t’e contenido, awa puro di tur riu, zonido cristalino di tur e olanan di nos lama.

Mi kier t’e piscado pidiendo proteccion, yena taray cu pisca pa regresa feliz na cas.

Mi kier t’e movemento, bay bin di tur palmera, mi kier crusa frontera y siña nabega.

Mi kier ta warawara bulando den sabana, halanan di confiansa venciendo gravedad.


Mi kier t’e ruman, cana man den man, aire puro di igualdad pa yuda bo respira.

Mi kier t’e maestro, bo guia y consehero, frescura di awasero pa yuda bo relaha.

Mi kier t’e bon amigo y fiel acompañante, bos di tur cantante sin temor pa expresa.

Mi kier t’e compañero, bo forsa y aliento, tur ora y momento di prueba y soledad.


Mi kier t’e artista transmitiendo alegria, tur gota di fantasia sin sconde realidad.

Mi kier ta faro di luz briyando den scuridad, profeta di amor y vlam di hermandad.

Mi kier ta poesia, ray’i solo di energia, tur sonrisa y simpatia riba nos cara refleha.

Mi kier t’e dushi ritmo, resonancia di cuero, biento placentero, brisa suave tropical.


Mi kier t’e grandesa, refleha den nos Bandera, kibra tur cadena pa bula cu libertad.

Mi kier ta Papiamento y cada pensamento, dushi sintimento den tur frase pronuncia.

Mi kier t’e poeta, esencia di nos tera, tur forsa di madera di un watapana bon planta.

Mi kier t’e arkitecto, e cas di mas perfecto, tur misterio y secreto bao tera bon warda.


Mi kier t’e instrumento, obr’i arte mas completo, skirbi pensamento cu pen di unidad.

Mi kier ta conocemento, sabiduria di silencio,siña otro pisca en bes di dun’e pisca.

Mi kier t’e refleho, conexion cu universo, un mirada cla na cielo pa keda inspira.

Mi kier ta un guerero, tur forsa y aliento, sin miedo pa bataya, entrega y sacrifica.


Mi kier t’e sintimento, pensamento y recuerdo, talento di nos pueblo, memoria graba.

Mi kier ta yiu di tera, pasion y fortalesa, rosea sin frontera pa bay te den profundidad.

Mi kier t’e gobernante, mirando atras pa bay dilanti, mane luz di lampi cu su claridad.

Mi kier ta santo blanco, lastro di puresa, curason di nos tera yen noblesa y bondad.


Mi kier ta, nos solo caluroso y lama, color naturalesa encanta; luna, cielo y tur strea.

Mi kier ta, isla Caribense y tropical, calor di nos cuna venera, tur magia di nos suela.

Mi kier ta, mensahero di bo libertad, agente di paz, fe y berdad, alma di e poema.

Mi kier ta, himno di e patria Inmortal, cu Dios por guia y conserva Aruba Dushi Tera.


John Freddy


 


ARUBA NOS HERENCIA


NO TA EXISTI UN HERENCIA CU MAS BALOR

NI TAMPOCO CU ASINA UN BUNITA SPLENDOR

MANERA E PERLA DRUMI DEN LAMA

CU TA ARUBA, NOS ISLA ENCANTA


BANDA PAZUID E OLANAN SUAVE TA CARICIA

SU SANTO BLANCO CU NO TIN PA IGUALA

E MESUN SANTO BLANCO CU TA WORDO UZA

P’E TURTUGA POR SIGUI PROCREA


BANDA PANORT TIN PAISAHE ADMIRA PA TURISTA

CU TA RECREA Y DISFRUTA DI E BUNITA BISTA

E MESUN PAISAHE NA UNDA PUEBLO TA HIBA FAMIA

PA GRANDI Y CHIKITO POR PASA UN DUSHI DIA


BUNITA PARHA TA DORNA SHELO DI NOS BARANCA

ENTRE OTRO WARAWARA, KINIKINI Y ALABLANCA

SU SUELA TIN UN VARIACION DI MATA Y FLOR

MANERA FLAMBOYAN Y CAYENA DI TUR COLOR


TA NOS DEBER DI PROTEHA Y CUIDA NOS HERENCIA

CU INTERNACIONALMENTE TIN GRAN COMPETENCIA

P’ESEY TA IMPORTANTE PA CADA GOBERNANTE

PERCURA PA NOS HERENCIA KEDA INTERESANTE


NOS HERENCIA TA UN RIKESA INCOMPARABEL

CU TA DUNA NOS UN SENTIMENTO INEXPLICABEL

TA P’ESEY NOS MESTER CUIDA NOS HERENCIA

PASOBRA CADA CAMBIO LO TIN SU CONSECUENCIA


MESTER VIGILA NOS CUSTUMBER Y CULTURA

Y PONE ATENCION NA NOS INFRASTRUCTURA

MESTER EDUCA PUEBLO PA TA CONSCIENTE

DI E IMPORTANCIA DI NOS MEDIO AMBIENTE


NOS HERENCIA HAMAS POR WORDO CUMPRA

Y MUCHO MENOS WORDO REGALA

PASOBRA NOS TA DETERMINA PA DEFEND’E

CU CURPA Y ALMA SI TIN MESTER


NO TA EXISTI UN HERENCIA CU MAS BALOR

NI TAMPOCO CU ASINA UN BUNITA SPLENDOR

MANERA E PERLA DRUMI DEN LAMA

CU TA ARUBA, NOS ISLA ENCANTA


LUIS RODULFO

MAART 2022