Sv Bubali ta titula campeon den futbol femenino Copa Aruba Bank Liga Plata


E Campeonato di Liga Plata den futbol femenino 5 x 5 di AVB patrosina pa Aruba Bank NV a yega su final diadomingo atardi ora cu e dos finalistanan esta Bubali y Dakota a topa otro pa e duelo den “Last Women Standing”. Un final cu e conta cu un publico grandisimo cu a rondona e mini cancha di futbol na e compleho deportivo Franklyn Bareno na Piedra Plat.


Prome a introduci e dos ekiponan mescos cu den weganan grandi y despues a hiba palabra representantenan di futbol femenino den AVB y mas cu claro e patrosinador Aruba Bank. Mester bisa cu nos a presencia un bunita final entre e dos ekiponan aki cu a inicia cu hopi tension y nerviosismo.

Pa loke ta e wega mes mester bisa cu cada bez cu Bubali a anota gol, Dakota ebini bek den e wega y empata esaki. Den e di dos tempo e wega tabata 3 – 3 y aki e MVP di e wega final esta e capitan Rachelle Mora tabata grandi unda e ta yuda su ekipo Bubali bira campeon anotando dos gol. Na final e wega ta termina 6 – 3 na fabor di Bubali. E golnan di Bubali a bini di Tamika Almary, Edylienne Tromp y 4 gol di Rachelle Mora cu porcierto e bira e MVP y Goleador Maximo di e campeonato. Pa e ekipo di Dakota e anota e golnan Shamira Mathilda, Sharriene Vrolijk y Richadella Williams.


Na final Minister di Ensenansa y Deporte, Sr. Endy Croes den presencia di miembronan di AVB a hasi entrega di e medaya y trofeonan na tur e ekiponan cu a triunfa.



Portret di: AVB