Un iniciativa di HOH y Osseointegration Center Rotterdam:
PROME CIRUGIA DI OSTEOINTEGRACION NA HOSPITAL DI ARUBA
Un primicia hunto cu Technische Universiteit Delft na Hulanda
Amputacionnan di pia ta wordo ehecuta pa basta tempo caba na Horacio Oduber Hospital (HOH). Pero recientemente, esta fin di October, a realisa un otro primicia mas na HOH unda a opera un pashent pa prome biaha na Aruba hacienda uzo di e tecnica yama osteointegracion. Esaki ta un tecnica di cirugia nobo unda ta introduci e protesis den e weso y ta integra esaki cune (tecnica di integracion). E protesis ta sali di e cuero y asina tin un conexion directo cu e protesis di cana pa asina tin un control mas preciso na momento di cana. Pues e uzo di un ‘prothesekoker’ lo no ta necesario mas. Problemanan di e ‘prothesekoker’ ta e motibo mas grandi pa un operacion asina
E experiencianan mundialmente ta hopi bon y e operacion aki ta mehora e calidad di bida di hopi pashent. Ciruhanonan di HOH (dr. Caroline Hoenders, ciruhano ortopedico y dr. Yuri Casseres, ciruhano general) y dr. Oscar van Waes, ciruhano traumatologo di Osseointegration Center Rotterdam a colabora intensivamente cu resultado masha satisfactorio.
E prome pashent cu a ricibi e operacion aki na Aruba ta cuminsa awo (despues di dos siman) poco poco para riba su pia di protesis. E pashent tabata pura pe momento yega y ta hopi contento cu e resultadonan. Claro cu semper tin chens pa haya complicacion, cual den porcentahe ta comparabel cu e operacionnan di rudia y heup. Dr. Van Waes a bin specialmente Aruba pa dirigi y guia e evento historico aki pa HOH y ta hopi content cu e colaboracion.
Meta ta pa den futuro sigui amplia y intensifica e cooperacion pa asina yega na un “Osseointegration centre of the Antilles” (OCA). Nos prome pashent awo lo cuminsa cu su trayecto di rehabilitacion pa asina perfecciona su canamento.
Gradicimento ta bay na Hunta Directiva di HOH y tambe na e grupo cu a tuma e iniciativa consistiendo di dr. O. van Waes, ciruhano traumatologo di Hulanda, dr. M Paping, dokter di rehabilitacion di Hulanda, dr. C. Hoenders, ciruhano ortopedico na Aruba, dr. Y. Casseres, ciruhano general na Aruba y dr. P.H. Jongerius, dokter di rehabilitacion na Aruba.
Masha pabien HOH y Aruba cu otro paso inovativo y exitoso den cuido medico!
FIN