Riba 30 oktober proximo, Departamento di Asuntonan Economico, Comercio y
Industria mediante su unit Iniciativa pa Desaroyo di Empresa Arubano (IDEA), ta presenta su proyecto “Sport Entrepreneurship”, organisa den colaboracion entre Minister di Economia, Comunicacion y Desaroyo Sostenibel, Minister Geoffrey Wever y e Minister di Enseñansa y Deporte, Minister Endy Croes.
Departamento di Asunto Economico y su unit IDEA ta ofrece tayernan riba
diferente topico. E meta ta pa capacita nos comerciantenan chikito y duna nan e
tools necesario pa por ta exitoso. Cu e tayernan aki manera Sport
Entrepreneurship di IDEA, ta comparti cu esnan cu kier bira un comerciante, e
informacionan y conocemento necesario pa start.
E tayer aki ta specialmente dedica na tur esnan cu ta desea di dedica na un
actividad di deporte den un forma comercial. Lo delinea un iniciativa strategico pa
promove actividadnan comercial den deporte door di cultiva un cultura caminda
deporte y negoshi ta crusa otro. Door di crea un serie di tayernan dirigi pa
interesadonan den e sector aki, e proyecto aki tin como meta pa sostene un grupo
cu tin entusiasmo den e industria di deporte cu ta cla pa hasi un impacto riba
economia di Aruba y den region.
Topico nan di e tayernan ta inclui:
Introduction to Sport EntrepreneurshipIdentifying
Opportunities in Sport Entrepreneurship
Marketing and Sales in Sport Entrepreneurship
Financial Planning and Management for Sport Entrepreneurs
Legal and Ethical Issues in Sport Entrepreneurship
Sport Innovation and Technology
Leadership and Team Building in Sport Entrepreneurship
Sustainable Practices in Sport Entrepreneurship
Winning with Sport Tourism
IDEA a selecciona un team di experto prominente pa e tayernan. Cada facilitador
ta un lider den nan tereno, algun di nan tin experencia den maneha inovacion y
tin exito den entrepreneurship den deporte. E combinacion diverso di nan
background lo trece conocemento amplio y completo den nos tayernan.
E projecto lo start dia 30 di oktober y lo termina den luna di februari 2024. E ta
consisti di un total di 9 topico, 18 tayer y un total di 24 sesion. E horario di les lo ta
di 7 pm – 9 pm. Costo pa participante pa e workshop aki lo ta Fls. 175.00. E
workshop nan lo tuma lugar den Departamento di Asuntonan Economico,
Comercio y Industria situa na L.G. Smith Blvd 160, Sun Plaza Building. IDEA lo tene
cuenta cu e dianan festivo den luna di december y tambe cu e actividadnan di
Carnaval 70.
“Mientras tanto cu nos ta explora den e industria deportivo, nos ta mira un futuro
unda inovacion y crecemento economico ta crusa otro y ta forma un parti integral
den e mundo di deporte”, minister Wever a comenta. E projecto aki no solamente
ta pa fortalece e participantenan, pero tambe pa duna un aporte significante na
prosperidad economico di nos pais Aruba.
