Drumi trempan diasabra pa bo lanta diadomingo mainta bon sosega pa bo disfruta di e salida di solo den bo hardin. Lo bo ripara cu 6:00 AM parhanan ta cuminsa canta y sali for di nan neishi. Pone un tayo of baki cu awa fresco pa nan pasa bebe. Si bo tin un Birdfeeder, pone simianan pa nan bin come. Cana den bo hardin y disfruta di e fragancia cu flornan ta emiti mainta pa atrae abeha, y barbulet pa nan por bin bebe nectar y asina polinisacion ta tuma luga. Si bo tin algun mata di berdura bo por pasa corta e foyonan di Spinazie, Torohil, Yerba di hole, Moringa, Oregano etc, pa bo uza na cas. Semper prome cu bo corta e foyo di un mata, pidi’e permiso y gradici’e tambe. Mata ta sinti nos energia positivo y lo sinti contento cu a comparti, y ta gradici y aprecia nan. Bo hardin ta un sitio caminda cu bo por disfruta di e gran evento di naturalesa, caminda cu mata y especienan ta inter actua y celebra bida. Pesey na e ocacion aki no sinta of cana den bo hardin pensando kiko pa haci mas oro, ni mayan of dialuna. Sea presente cu naturalesa y lo bo experencia un tipo di comunicacion y sentimento natural. Si bo ripara cu bo tin cu haci algun cos pa drecha bo hardin, haci nan cu gusto, bo hardin mester ta un pida Paraiso di bo cas caminda bo por conecta cu naturalesa y sinti harmonia y felicidad.