ORANJESTAD - Na aña 2018, Gobierno di Aruba a institui Veiligheidshuis Aruba, pa asina yuda combati problemanan social of criminal. Veiligheidshuis ta un plataforma na unda diferente instancianan di e cadena hudicial y di cuido, y otro partnersnan manera enseñansa ta traha hunto riba casonan compleho di problemanan social of criminal.
Prome Minister Evelyn Wever-Croes a indica cu despues di a celebra 5 aña di existencia, e cadena aki a demostra di ta un cadena sumamente valioso pa por yuda atende e problematica cu ta scondi tras di criminalidad, y tras di abuso y violencia domestico. Prome Minister como esun encarga di e "stuurgroep" aki, a ricibi di señora Bernice Schulte, e relato annual di 2023, cu ta indica cu na aña 2023 tabata tin un total di 123 caso nobo, cu ta un cantidad basta constant den ultimo añanan. Tambe, por a nota cu e casonan di violencia y abuso ta birando alarmante mescos cu adiccion y problemanan psychiatrico.
E plataforma aki ta consisti di varios instancia y departamento cu ta bin hunto cada dos siman pa trata casonan nobo y esunnan existente. Nan grupo di meta ta hobennan cu ta na riesgo, personanan cu problemanan mental, y esnan cu tin tanto problema mental y adiccion, tambe e grupo creciente di abusadornan y di victimanan den caso di abuso relacional, adultonan mayor, y esnan no documenta. Unabes nan detecta un problema, nan ta tuma accion lihe pa asina evita cu hobennan, adultonan mayor of otro persona haya nan den crisis cu lo causa hopi mas tempo, energia y placa pa por wordo soluciona.
Prome Minister ta sumamente satisfecho di e trabou cu Veiligheidshuis a bin ta eherciendo, y ta gradici señora Bernice Schulte pa tur su dedicacion na yuda combati e problemanan serio aki. Tambe, Prome Minister ta desea e team completo hopi forsa y exito pa por sigui eherce e bon trabou.