Un hoben tabata tin un deseo pa regala su mama un Parha pa su cumpleaños. El a dicidi di bay un Petshop pa wak kiko nan tin. E doño di e Petshop mes a atende cu e hoben y a bis’e cu e unico Parha cu nan tin, ta un Lora cu a biba den un bar y de bes encuando e por papia algun palabra picante of for di sla.
E hoben a pensa un rato y dicidi cu ta okay, cu su mama lo por tolera algun palabra colorido den cas pa brind’e compania.
El a cumpra e Lora y a hib’e cas. Pa e mainta di su cumpleaños, e hoben a trese e Lora den sala pa sorprende su mama, el a splica su mama unda e lora a biba y cu de bes encuando e por papia algun palabra skerpi. E mama a smile y bisa no ta problema. E Lora a cuminsa bula rond di contento i a bisa, "Cas nobo, cas nobo y Señora nobo!"
E mama a hari y a goza e palabranan di Lora masha hopi.
Un rato despues, e dos yiu muhernan di e mama a yega e fiesta. E Lora a mira nan drenta i a bisa; "Cas nobo, señora nobo, dos chick nobo!"
Tur hende den e fiesta a cuminsa hari y goza e Lora su habilidad y palabranan.
Mei mei di e harimento y ambiente algegre den e cas, e casa di e señora a yega y a bay den sala pa saluda tur presente. E Lora a mir’e i a bisa, " Hector, Hector, hopi dia sin mirabo, sin mirabo!"
Tur hende den e fiesta a grita hari, menos Hector.
Comments