Ta dicon mi closet a bira asina yen y slordig?
E bulto di paña cu tur dia bo ta pone y saca for di bo closet cu hangernan di banda cu mita paña cologa na dje ta converti un area cu mester ta funcional den un desastre. Hopi biaha nos ta cumpra paña nobo y nos no ta saca esunnan bieu.
Pensa kiko ya bo a bisti y cu bo a gusta den e ultimo tempo y dicidi kiko ta bay y kiko ta keda.
1 MINUUT: REUNI TUR LOKE BO TIN MESTER
Prome cu bo habri bo cashi of closet, prepara un par di saco y baki di plastic pa yuda bo sortia tur paña. E dos bondernan cu bo ta bay traha ta un pa donacion y un pa benta afo of pa corta pa uza como vod. Pañanan mas elegante cu bo no ta bay bisti mas; bo por escohe pa bende of pa regala un hende/amiga cu tin mester algo pa e bisti pa un ocasion special.
Por ta cu bo ta kere cu bo tin mester di mas saco , hanger y baki di plastic…..
NO CUMPRA NADA!.... esakinan lo djis bira mas rommel den bo cas.
1 MINUUT: LIMPIEZA
Pone cla: tur cos pa cu bo mester pa limpieza, vod/rapo humedo, multipurpose cleaner, basora, scop y stofzuiger.
3 MINUUT: SACA TUR COS AFO
Riba bo cama ta e lugar mas logico pa reuni tur bo pañanan .
Si ya bo tin den bo closet/cashi tur paña surti manera saya, blusa , shimis y carson separa caba pone nan mescos riba bo cama. Saca tambe tur baki y organizers afo, pa bo closet keda to almente bashi.
3 MINUUT: LIMPIA BO CLOSET
Awor cu bo closet ta completamente bashi, hasi e lachinan limpi, tambe tubo/bara di paña, murayanan y ful rond den bo closet cu e vod humedo. Despues stofzuig of bari full bo closet pa kita tur stof y tera cu por a keda atras.
3 MINUUT : WAK DEN BO CLOSET
Prome cu bo pensa pa pone tur cos bek den bo closet, dal un par di stap patras y check bon e espacio den bo closet. Pensa riba kiko si a funciona y kiko no.
Pensa riba:
Paña, sapato, tas, faha y acesorionan cu mas bo ta uza.
Cosnan cu semper bo tin problema pa yega na nan.
Cua cosnan lo ta miho pa bo dobla, y cu no mester ta necesariamente colga.
15 MINUUT : REVISA TUR BO PAÑANAN
E paso aki sigur por tuma mas cu 15 minuut, pero e por bay lihe tambe si bo ta un persona decidido y si bo tin e custumber di hasi esaki cada 3 of 4 luna.
Awor ta e momento cu bo ta bay tuma un pa un; sea pañanan, sapato, tas of acesorionan y dicidi cua ta keda y cua ta bay bek den bo closet/cashi.
Pa Yuda Bo Mes Dicidi Mas Lihe,
PUNTRA BO MES E 4 PREGUNTANAN AKI:
E ta sirbi mi of pas mi ainda?
Mi a bisti’e of uz’e den e ultimo 12 lunanan ?
Mi ta bay drech’e ? ( esaki ta relevante na paña of acesorionan cu mester drecha of cu ta daña)
Mi ta sinti mi sigur den dje?
Si e contesta ta “NO” na cualkier un dje preguntanan aki, pone un banda en bes di pone bek den bo closet/cashi.
Si bo uza e palabra mi LO MESTER keda cun’e, como hustificacion pa keda cun’e, esaki ta un indicacion cu bo mester lag’e bay.
Una bes cu bo tuma bo decision di keda cu loke bo a scoje; pone tur esakinan bek den bo closet.
Organisa bo pañanan mescos hunto, por ehempel;
Blusa, saya, shimis, carson, jacket y purba pasa lihe door di tur paña y acesorionan.
Si bo tarda bo ta haya bo ta keda pensa mucho riba e pañanan cu bo tawata fit antes den nan, pa bo trabao of lifestyle.
Bo meta ta pa bo closet traha pabo, pa e hende cu bo ta awe.
4 MINUUT: HASI’E NECHI Y AGRADABEL
Una bes cu bo closet ta yen atrobe cu solamente loke cu bo a keda cune, tuma un par di minuut pa organisa tur cos na nan luga na e tipo di e prenda y color.
1 MINUUT : FINALISA TUR COS
Tuma e saconan di haci donacion y pone nan mes ora den bo auto. NO lagan an poni un caminda unda cu nan lo stroba. Pone e otro saconan di cosnan pa bende y regala tambe un banda, tape esakinan c’un papel riba nan pa indentifica kiko tin den nan.
Ken sa, por ta e proximo experiencia di organisa bo closet lo dura solamente 15 minuut !!