Cu 79 aña di edad.
ORANJESTAD (AAN): E ta un di e artistanan mas grandi cu Aruba a conoce! Cualkier cas di famia cu e bishita unda tin brindis, e ta baha for di su auto, cu e guitara bao braza!
Musica ta su mundo! Musica ta su forma pa haci su prohimo feliz! Musica ta e medium cu e ta yuda tur otro hende sobresali for di cualkier tristeza, cualkier emocion, y haci un alma feliz, sikiera si acaso ta djis pa un rato.
Diamars merdia, nubianan scur por a wordo mira ta pasa den algun area di e isla. Mas despues alrededor di 1’or di merdia, e noticia tristo a drenta cu Etty Toppenberg a fayece, despues di un lucha di basta tempo cu e malesa di cancer. Etty tabatin 79 aña di edad.
Etty su nomber di berdad ta Alex Edward Toppenberg, y el a nace na Aruba dia 19 di Augustus 1943, a crece y desaroya su mes den pueblo di Companashi na Playa. Etty tabatin 10 otro ruman, y un par di nan tambe tabatin amor pa musica. Etty su interes pa musica a cuminza di hoben caba, y a hasta purba toca riba un guitara cu tabata bastante kibra.
Esey tabata e base cu a yude epande su conocemento musical, su habilidad perfecto pa adlib y traha letra pa cancion cualkier momento cu ta, y a cuminza forma parti di grupo musical tambe unda el a sigui perfecciona su talento.
Tur e granito di arena aki a pone cu Etty awendia ta worde considera como un di e cantante- y compositornan Arubano di mas importante, emblematico y legendario di henter e historia di e isla aki.
Su comienzo mes: Tur cos a cuminza na aña 1957 unda el a bay toca cu su amigonan pa un señora masha popular e tempo ey den Companashi, esta 'Shi Clotilda'.
Hopi ta convenci, cu e carera musical di Etty a subi manera un stichi bay halto na aña 1978 y despues tambe na 1991 caminda Etty hunto cu su Trio Huasteca a bira e prome artistanan Arubano cu ta representa e isla dos biaha den Festival Internacional di Cancion Iberoamericano, esta 'Festival OTI'. E tabata un di e festivalnan musical internacional di mas renombre di tur tempo.
Otro logro importante ta su composicion "Balia di Sehu" cu a worde decreta como un Earth Song, pues un cancion cu ta worde considera como un himno di humanidad. E cancion aki ta worde presenta na numeroso ocasion den e teatronan di mas renombra y door di e coronan di mas popular internacionalmente.
Y e reconocimento di Etty como fabuloso musico a traspasa fronteranan. Empresarionan di otro pais tin biaha tabata invita Etty pa bay te na nan pais, pa sirbi como 'entertainer' pa nan actividad di negoshi. Djis pasobra nan ta encanta e forma con Etty ta interactua cu publico.
Su carera en general: Ademas di ta un musico renombra, tin di corda cu Etty a cuminza traha na comienzo na Ontvanger der Belasting, y posteriormente a bira un docente hopi stima di scol basico na Playa. Sinembargo semper na tur ocasion, e guitara ta acompañ’e na cualkier actividad, y den su tempo liber ta compone musica.
Su logronan, exitonan, premio y reconocementonan ta excepcional y numeroso. El a representa Aruba na varios pais rond di mundo y ta varios ta e cantantenan cu a interpreta su composicionnan. Masha poco artista sinembargo tin e privilegio y dicha di por cumpli 65 aña activo den e mundo di entretenimento.
Apenas luna pasa, rond di fecha di su cumpleaño, e grupo local Fundacion Go Cultura, Unoca, Departamento di Cultura Aruba y Ministerio di Finansas y Cultura a anuncia e homenahe dedica na Etty Toppenberg. Esaki a tuma lugar riba Plaza Nicky Habibe.
Etty mes no por a acudi na esaki, como cu e tabata basta malo riba cama, y aunke su bista tabata basta malo, toch el a sigui e reconocemento aki via TV.
Su consehonan semper: Etty Toppenberg ta un hende cu cada biaha cu bo combersa cune, ta positivismo ta brota for di dje. E ta dunabo conseho pa tur cos! Sea ta receta pa pastechi, con pa progresa den bo negoshinan, y hasta kico pa haci cu bo hardin na cas.
Pesey semper su amigonan ta bisa, cu como yiu di tera, tur hende tin di aprecia e persona aki, kende semper tabatin cultura di Aruba na pecho, combina cu su amor inmenso pa musica, y e bienestar di prohimonan Arubiano na prome lugar.
Na su famia, conocir, amigo-, y coleganan, DIARIO y famia Mansur ta extende su mas profundo palabra di condolencia. Cu Etty sosega na paz.