Tema di Appeltjes van Oranje pa 2024: Ta hunto nos ta combati soledad!
Oranje Fonds ta buscando iniciativa unico cu por ta bon candidato pa un Appeltje van Oranje 2024. E aña aki, nos tin e tema: Ta hunto nos ta combati soledad: Proyecto den cual e participante- y voluntarionan ta traha hunto, y riba un base di igualdad, pa combati soledad. Un iniciativa asina tin chens di ricibi un di e tres Appeltjes van Oranje cu lo wordo presenta pa Reina Maxima, pa di 22 biaha, na october 2024.Di awor te 23 di februari 2024, bo por inscribi bo organisacion via oranjefonds.nl/appeltjes.
Pa bini na remarke, bo iniciativa mester ta unico, creativo y valioso, y e mester ta cumpli cu e necesidad cu hende tin di bini hunto, topa otro y wordo trata como un persona cu tin balor. E persona mester wordo acerca a base di loke e tin di ofrece; no a base di su soledad. E participante- y voluntarionan mester ta realmente envolvi den desaroyo y ehecucion di e actividadnan. Nos ta interesa den proyecto caminda bo no ta mira un diferencia grandi entre e voluntarionan, cu ta duna atencion, y e participantenan, cu tin mester di atencion. Pasobra, ora bo haci algo pa otro, esey ta yuda bo mes tambe.
Soledat: un problema urgente
Soledad ta un problema urgente; uno di cada dies persona ta sinti soledad. Y no ta trata aki di hende di edad so, sino otro grupo tambe, manera hoben, migrante y persona cu un orientacion sexual diferente.
Ora bo ta sinti soledad, bo ta sinti cu bo falta algo, cu bo no tin berdadero contacto cu otro hende. Tur hende por y a yega di sinti asina na cierto momento. Bo ta sinti cu bo a cay den un estado di isolacion, cu hende no sa cu bo t’ey, of cu bo no ta nifica nada pa nan. Y bo por sinti soledad hasta si tin un grupo grandi di hende rond di bo. Un acercamento efectivo lo mester logra yuda e persona tuma accion, pone su bida bek bou di control y hiba un bida cu sentido.
Tocante Appeltjes van Oranje
Tur aña, Oranje Fonds ta otorga e premio Appeltjes van Oranje: e premio prestigioso pa duna reconocemento na iniciativa valioso. Asina, nos ta honra y premia tres iniciativa cu ta contribui na un comunidad inclusivo den cual e habitantenan ta sinti cu nan tin un compromiso cu otro. Nos ta interesa den iniciativa cu ta unico, creativo y valioso, y cu tin dos aña of mas activo. Na prome luga, un Appeltje van Oranje ta un muestra di aprecio pa e trabou y dedicacion di e organisacionnan ganado. Ademas, e intencion ta pa e premio sirbi como un inspiracion pa otro. Oranje Fonds ta traha pa un comunidad den cual un y tur por participa, niun hende no mester sinti nan solitario y niun hende ta desampara. Pasobra tur hende ta conta.
E premio pa cada un di e tres ganadonan ta consisti di un figura di brons, obra di Prinsesa Beatrix, y un suma di € 25.000,-. Por uza e suma aki libremente den cuadro di e obhetivo di e iniciativa ganado. Tur aña, Reina Maxima ta haci entrega di tres Appeltje van Oranje na Paleis Noordeinde. Pa mas informacion: www.oranjefonds.nl/appeltjes.