Den e ultimo añanan temanan manera “Empoderacion Femenino”, “Hermandad” (sisterhood), “Solidaridad” y “Apoyo mutuo entre hende muhe” a bira temanan hopi alcaso.
Segun revista Forbes, hende muhernan cu ta apoya otro tin mas exito den bida. Manera ta ser menciona hopi, hende muhe individualmente tin poder, sinembargo colectivamente nan ta crea un forsa mas fuerte y ta hasi impacto.
Solidaridad entre hende muhe ta crea union y ta permiti pa hunto traha pa enfrenta obstaculonan den bida y sociedad. E union aki ta un herment poderoso pa logra cambio significativo den sociedad, manera combati discriminacion y violencia contra hende muher pero tambe supera desigualdad di oportunidad den sociedad.
Sin embargo, ainda ta existi un cierto rivalidad of competencia entre hende muhernan. Apoyando otro por haci un diferencia tremendo.
Dicon hende muhe NO tur ora ta apoya otro
Ta algo cu ta wordo hasi inconscientemente. Varios estudio ta constata cu television tin e habilidad di normalisa eventonan y custumbernan cu ta wordo transmiti via di pantaya, cual por tin efecto tanto negativo como positivo. Desde un edad hopi hoben, nos mente ta ser exponi na programanan di television y peliculanan na unda cu hende muhe semper ta wordo proyecta contra di otro. Den cierto manera, esaki ta ser programa den e mente subconsciente y despues inconscientemente ta ser aplica den bida real. Ademas, e falta di oportunidad di trabao pa hende muhe ta hasi cu ta surgi un cierto competencia entre hende muhe.
Aki 5 manera con abo como hende muhe por apoya un otro hende muhe:
1. Celebra logro di otro hende muhe.
Celebra logro, sea ta grandi of chikito, esaki facilmente ta kibra e expectativa social di envidia y competencia entre hende muhe. Duna compliment, apoya otro abiertamente y publicamente.
2. Traha riba bo mes.
Mas bo traha riba bo mes, mas bo ta compronde y apoya exito y talento di un otro hende muhe. Si algun biaha bo gara bo mes ta husga of critica un otro, puntra bo mes si ta esey ta e percepcion cu bo tin di bo mes. Hopi biaha nos ta refleha local nos ta pensa di nos mes.
3. Comparti informacion y recurso cu por yuda otro avansa den nan carera of yuda logra nan meta.
4. Comparti amabilidad. Si bo ta sinti den bo curason di bisa algo amabel, Haci’e. Nunca bo no sa kico un otro persona, sea hende muhe of hende homber, ta pasando aden. Hasta algo simpel manera un smile por cambia animo di un persona.
5. Duna e siguiente generacion e ehempel di apoya otro hende muhe. Empoderamento di hende muhe semper mester cuminsa cu e gesto di mas chikito di cas. Siña positivismo corporal, confiansa den bo mes. Tur e puntonan aki ta contribui na bon salud mental y optimismo den hende muher.