• Hits 100FM

Buki tocante Maternidad den 4 idioma cu pintura di Gustave Nouel

Buki tocante Maternidad den 4 idioma cu pintura di Gustave Nouel


Durante henter su embaraso y net despues di nacemento di su yiu muhe Lilian na 2015, modelo y actriz Zuleika Coffie a pose pa un serie di 34 pintura ‘Maternidad’ di e pintor profesional Gustave Nouel.


Na 2015 y 2016 diferente exposicion y actividad artistico y di modelahe a tuma luga na Apeldoorn, Rotterdam y Amsterdam rond di e tema aki. Ramon Todd Dandaré, cu tabata na un di e exposicionnan, a lansa e idea pa traha un buki di e pinturanan di Gustave y e textonan personal di Zuleika cu tabata colga bou di cada pintura.


Di soño pa realidad

Pa por haci e buki posibel, e dos artistanan profesional Arubiano a uni cu diferente persona cu mente creativo y dinamico pa purba realisa nan soño. E resultado lo mester tabata pa e bira un buki, no solamente den cual e amor di mama intemporal y e experiencia di e muhe na estado (y e mama reciente) ta ser refleha den imagen y palabra, sino tambe un buki den e cuater idiomanan mas papia na Aruba (esta Papiamento, Hulandes, Ingles y Spaño).


“Ademas di ta cuatrilingual, e buki, cu ta un oda na maternidad universal, tambe tin e aspiracion di crea un brug entre e parti Europeo y e parti Caribense di Reino Hulandes y entre nan y resto di mundo, den e sentido artistico di e palabra”, segun Nouel.


A base di e texto original di Zuleika Coffie a cuminsa cu e preparacionnan pa e buki sali publica bou di e titulo: ‘Maternidad’ di soño pa realidad den imagen y palabra (‘Moederschap’ van droom tot werkelijkheid in beeld en woord, ‘Maternity’ from dream to reality in images and words, ‘Maternidad’ de sueño a realidad en imágenes y palabras).


E texto Hulandes a ser revisa pa e escritor Benne Solinger y e traductor Fred de Haas. E texto na Ingles a ser revisa pa Maureen Berkel. E textonan na Papiamento y Spaño a ser revisa pa Ramon Todd Dandaré, kende, ademas di ta e motor tras di realisacion di e buki, a tuma encargo di e revision final.


E talentoso hoben poeta Rosabelle Illes tabata dispuesto pa skirbi e prologo y ta constata cu: “Fragmentando honestidad den simpel narativa, Zuleika ta haci e acto di comparti mustra natural...”.


Quito Nicolaas, escritor y critico literario, ta culmina riba e kaft patras cu: “E buki Maternidad ta refleha un biahe interior den e bida emocional di un hende muhe na estado. (...)

E pintura- y poesianan ta representa e momentonan y e cambionan cu un hende muhe ta experencia, como tambe e interaccion entre naturalesa y individuo (...)”.


A acerca e diseñado grafico Steffen Maas pa profesionalisa e buki, mientras cu LM Publishers tabata tin e produccion na su encargo.


E publicacion a bira posibel danki na sosten di: Union di Organisacionnan Cultural Aruba (UNOCA), Vertegenwoordiging van Nederland in Aruba (VNO), Servicio di Telecomunicacion di Aruba (SETAR N.V.), Fundacion Cas pa Comunidad Arubano (FCCA) y Fundacion Corector di Papiamento (FCP).


___________________________________


Buki ‘Maternidad’ di soño pa realidad den imagen y palabra (‘Moederschap’ van droom tot werkelijkheid in beeld en woord, ‘Maternity’ from dream to reality in images and words ‘Maternidad’ de sueño a realidad en imágenes y palabras) - Gustave Nouel & Zuleika Coffie. ISBN: 9789460225260.

Idioma: Papiamento, Hulandes, Ingles y Spaño. Cantidad di pagina 96. Encuaderna.


Na Hulanda e buki ta obtenibel na, e.o., LM Publishers (https://lmpublishers.nl/catalogus/moederschap/).

Na Aruba e buki ta na benta den un edicion limita na e librerianan.


Pa mas informacion por tuma contacto cu: Ramon Todd Dandaré na ramontodd@setarnet.aw




0 views


Kolibristraat 2, Oranjestad, Aruba
Booking: (297) 583-4100
Studio: (297) 588-6100
Whatsapp: (297) 594-2400
Contact: hits100fm.aruba@hmail.com

 

Follow us
 

  • Facebook
  • Instagram
  • Podcast

Advertise With Us - Radio Spot Production

© Copyright 2020 by Hits 100.9 FM