Competencia

Mario Lobo ta sigui domina e ranking overall 2019 den e deporte di tennis di mesa

D4S_7260.JPG

E federacion di tennis di mesa, Aruba Table Tennis tur luna ta keda activo unda ta hunga e torneo di ranking di cada luna pa asina e atletanan por defini nan posicion. Den e ultimo dos simannan aki a hunga e ranking di februari den e diferente categorianan. Mas cu claro un di e mas interesantenan ta A-klas unda Mario, Andy, Jeandry y Chingho ta bataya fuerte pa e prome posicion. Mester bisa cu un bes mas Mario Lobo ta dominante y ta bolbe sera un otro luna na prome lugar. E resultadonan final den ranking di februari ta como lo siguiente

Den e Cat U11 nos tin na 1er lugar Dylan de Leca, na di 2do lugar Ethan Fan y na di 3er lugar e keda Chase Fan. Den e Cat U18, na 1er lugar nos ta haya Jeandry Mathilda, na di 2do lugar Johnatan Paredes y na di 3er lugar Josielienne Boekhoudt. Den e Cat A Klas nos ta haya na 1er lugar, Mario Lobo, na di 2do lugar Jeandry Mathilda y na di 3er lugar Chingho Chung. Por ultimo nos tin e Cat B klas unda na di 1er lugar nos tin Wing Chow Leong, na di 2do lugar e keda James Letren y na di 3er lugar a keda Donald Yarzagaray.

Stichting Sportsubsidie Aruba ta contento di por aporta y brinda e ayudo na e federacion di Aruba Table Tennis pa cu nan actividad di Ranking 2019. Alabes ta felicita e atleta Mario Lobo cu ta lidera e table di posicion den 2019.

Atleta Giannon Eights a triunfa den e prome evento di Off Road Aquathlon 2019

D4S_6794.JPG

Diadomingo mainta tempran alrededor di 80 participante a acudi na Arashi pa asina participa na e prome evento di Off Road Aquathlon den 2019. Tabata tin dos categoria unda den Supersprint e participantenan mester a core 2.2km, despues landa 375 meter y caba cu un recorido di 1.3km na pia. Den e categoria Sprint e participantenan mester a core 4.4km, landa 750 meter y caba cu un recorido di 2.6km na pia. Mas cu claro e Off Road Aquathlon no tabata nada facil sigur na comienso ora mester a core den e santo blanco pisa pa despues landa den un lama basta bruto cu olanan halto. Asina mes e mayoria a haci todo lo posibel pa pone un bon tempo y surpasa na propio marca. Mas cu claro e Kidsnan tambe a haci un tremendo trabou. Cada dia e interes ta creciendo serca nos muchanan cu ta gusta e reto. E hoben triatleta Giannon Eights a logra gana esaki cu un record personal.

Stichting Sportsubsidie Aruba ta contento di por aporta y brinda e ayudo na e federacion di Aruba Triathlon Association pa cu nan actividad di Off Road Aquathlon 2019. Alabes ta felicita e atleta Giannon Eights cu a logra conkista un prome lugar.

Tenistanan Sofie van Reek y Danna Nunez a keda na di 8 lugar

tennis (1).jpg

Tenistanan Sofie van Reek y Danna Nunez a keda na di 8 lugar den e Junior Fed Cup pre-qualifying event di COTECC na El Salvador

Recientemente e tenistanan Sofie van Reek y Danna Nuñez a competi den e Junior Fed Cup pre-qualifying event di COTECC. Mester bisa cu nos tenistanan a habri e prome ronda di e torneo den bon forma unda nan a gana e pais di Nicaragua. Despues nan ta cay venci contra e pais anfitrion El Salvador pero asina mes a logra pasa pa e main draw como di e dos mihor clasifica. Den e main draw Aruba a topa Puerto Rico cu tabata number 5 clasifica den e torneo aki. Den e wega aki Sofie y Danna ta cay venci y ta keda pafor di e siguiente ronda. Un bon prestacion sigur di nos tenistanan femenino van Reek y Nuñez.

Stichting Sportsubsidie Aruba ta contento di por aporta y brinda e ayudo na e federacion di Aruba Lawn Tennis Bond cu e biaha di nan atletanan Sofie van Reek y Danna Nuñez pa e Junior Fed-Cup pre-qualifying na El Salvador.

Prome competencia di Open Water Swimming celebrando Dia di Betico tabata un exito rotundo

AZB (1).jpg

Recientemente Aruba Swimming Federation, AZB a organisa e prome competencia di Open Water na cas di Roly Bisslik na Savaneta. Un total record di 91 landado a inscribi pa asina participa na e competencia cu tabata uno clasificatorio pa e Carifta Games cu e aña aki lo.tuma lugar na Barados. Mester bisa cu e mayoria a competi den e 1km y 3km, mientras un grupo selecta a dicidi di bay e 5km. E trajectoria sigur no tabata facil cu hopi coriente y biento pero asina mes tur hende a haci nan maximo esfuerso pa logra un bon resultado y tempo. E 1km a wordo gana pa Braynsly Dirksz mientras e 3km a wordo gana pa Elisabeth Timmer y e 5km a bay pa Lucien Peterson cu a triunfa anja pasa tambe den e mesun evento aki.

E comision di Open Water Swimming tabata hopi satisfecho cu e acohida di e prome competencia oficial clasificatorio di Open Water na Aruba. E landadonan a responde bon na e evento mientras e evento mes a cana soepel y segun schedule. E promixo competencia di Open Water lo ta rind dine celebracion di nos Himno y Bandera y esaki tambe lo ta un evento clasificatorio, e biaha aki pa e Central American and Caribbean Amateur Swimming Confederation, CCCAN.

Sportsubsidie Aruba ta contento di por aporta y brinda e ayudo necesario na e federacion di landamento cu nan prome actividad oficial di Open Water Swimming local na Aruba.

Feria Betico Croes 2019 den e deporte di cabay

OCA.JPG

E dianan 25 pa 27 di januari, esta diabierna, diasabra y diadomingo, e Organisacion Caballista Arubano, OCA lo organisa nan Feria Betico Croes, celebrando asina Dia di Betico 2019 esaki na e pista nobo di Rancho Bello Amanecer. E tres dianan di e feria aki lo wordo celebra den un localidad completamente diferente y nobo. E prome dos dianan lo tin competencia di cabay den modalidad di duenos, unda e campeon di nos isla ruman Corsow lo ta presente. Diadomingo lo tin e competencia di jinetes y amazonas di Aruba y Corsow. E ekipo di Corsow lo bin cu un ekipo di mas o menos 20 participante pa competi den e prome feria di anja na Aruba.

Aña pasa den e competencia di Interpaso 2018, Aruba su representatenan a score un bes mas logrando varios premio di honor entre e competidornan den nos region. Mas cu claro nos mihor jinete y amazonanan den e categoria infantil y hubenil lo tey pa asina sigura un bon puesto. Ta invita henter e pueblo di Aruba pa bin presencia un tremendo spectaculo di show di cabay na e rancho nobo Bello Amanecer situa na Papaya.

Stichting Sportsubsidie Aruba ta contento di por aporta y brinda e ayudo necesario na e federacion OCA pa cu nan prome actividad den 2019 esta e Feria Betico Croes.

Aruba Triathlon Association lo habri e temporada nobo cu un warm-up triathlon

D5A_5263.JPG

Diadomingo 20 di januari proximo, Aruba Triathlon Association lo organisa nan prome actividad pa loke ta e calendario deportivo di aña 2019. Manera custumber e federacion di triathlon lo habri e aña cu un Warm-up Sprint Triathlon pa tur e fiel amantenan di landamento, core bicicleta y core na pia. E actividad di Warm-up Sprint Triathlon lo inicia pa 7or di mainta na Boca Catalina unda cu por spera un cantidad grandi di competidornan den tur edad y categoria y asina engrandese e prome actividad di aña 2019.

Por competi den Super Sprint Keds te cu 14 anja, Sprint Junior y Adulto Male, Sprint Female Open 15+. E categorianan di mucha, junior y adulto, por participa Individual of den Team di Relevo. E distancia cu lo wordo recori ta como lo siguiente mucha te cu 14 aña a landa 375m, core bais 10km y core na pia 2.5km, mientras den Junior/Adulto esaki lo ta landa 750m, core bais 20km y core na pia 5km y e female 15+ lo landa 750m, core bais 20km y core na pia 5km. E deporte di triatlon a conoce un bon aña deportivo 2019 cu hopi actividad organisa pa nan miembronan y sigur tkambe un Aruba International Triathlon cu tabata exitoso. E calendario di actividad di 2019 ta premira di bira uno bon cu hopi evento di triatlon mes sin lubida, duathlon, sprint triatlon, kids triatlon y off road triatlon. Tambe no por keda sin menciona e competencianan den exterior cu nos tri-atletanan lo bishita.

Sportsubsidie Aruba ta contento di por aporta y brinda e ayudo necesario na e federacion di triathlon pa henter nan calendario di actividad den 2019.

Simpocio y competencia internacional di World Tang Soo Do

Hapkido (4).jpg

Aruba Tang Soo Do / Aruba Hapkido Association a asisti simposio international na Viña del Mar, Chile.

Recientemente un delegacionan di Aruba Tang Soo Do/Aruba Hapkido Association a biaha pa Santiago de Chile unda a atende un simpocio y competencia internacional di World Tang Soo Do General Federation ( Moo Duk Kwan Korea) y e associacion Pan Americano di Tang Soo Do Bi Sang Kwan (Sur America y Caribe). A atende e simpocio y competencia delegacionnan for di Korea, Malasia, Panama, Puerto Rico, Corsow, Argentina, USA, Brazil y mas cu claro Aruba. Nos delegacion a wordo representa pa Sr. Richard Vrolijk.

E topiconan trata riba e 3 dianan di simpocio tabata entre otro e formanan (hyungs) nobo for di Korea, combionan di reglamento ora di combate, p.e. ta wordo permiti awor pa tene, bari bo oponente pone ariba piso y finalisa cu un mokete, 3 tecnica den 1 accion pa un Ippon (punto completo). Cambio den duna punto p.e. 1,2 y 3 punto depende di e area di combate y tecnica uza. Otro tema cu a tuma basta tempo tabata e standarisacion di e formsnan(Hyungs). Dor cu a constata algun diferencia (minimo) dor di differente instructornan a dicidi aña pasa na November na Korea pa pone esaki como punto di agenda. Puntonan concretisa di e simpocio tabata e standarisacion di e formanan, un posibel curso di referee, y e cedenan pa e siguiente eventonan. Ta asina cu a scoge e combinacion Corsow -Aruba pa e competencia internacional na aña 2020.

A clausura e evento cu un campeonato international unda Aruba a wordo representa pa Ksn Bas Stock actualmente studiando na Hulanda. Ksn Stock a gana y perde un combate na Chile. Master Richard Vrolijk y bestuur di Aruba Hapkido Association - Aruba Tang Soo Do tabata masha contento cu e oportunidad di por a realisa e biahe pa Chile.

Stichting Sportsubsidie Aruba ta contento di por aporta y brinda e ayudo necesario na e Aruba Tang Soo Do / Aruba Hapkido Association a asisti simpocio internacional na Viña del Mar, Chile Stichting Sportsubsidie Aruba a yuda subsidia e biahe di presidente Master Richard Vrolijk pa e simpocio di Tang Sooo Do na Chile.

2018 Arubaanse Kampioenschap

DSC_9949.jpg

Competencia di esgrima 2018 Arubaanse Kampioenschap na IBISA San Nicolas.

Diaranson 5 di december, e federacion di esgrima SABA lo tene nan tradicional Arubaanse Kampioenschap den e sala di recreacion di IBISA na San Nicolas. E inscripcion lo ta den oranan di atardi mientras e competencia mes lo inicia pa 6’or di atardi. Clausurando e aña exitoso tras di lomba, pa e federacion di Esgrima, esaki lo ta e ultimo competencia pa loke ta e aña 2018. Mester bisa cu e atletanan di e tres clubnan di esgrima na Aruba esta Universal Fencing Club, Scherm Club Brazil y Don Bosco Knights lo bay duna un berdadero espectaculo den e deporte di arte marcial e dia aki. E deporte di esgrima ta den pleno desaroyo na Aruba unda tin hoben atletanan femenino y masculino cu ta considera prospectonan den e deporte di arte marcial y ta sobresali durante cada competencia.

E federacion di SABA semper a yuda den e desaroyo di e deporte Olimpico unda den pasado a organisa varios tayer y curso na nivel profesional pa nos atleta y dirigentenan. Dentro di algun aña sigur por mira e fruto di e deporte di esgrima na Aruba. Es mas sigur un cinco bes pa aña e federacion ta organisa nan torneonan y tambe ta bishita torneonan internacional den exterior.

Stichting Sportsubsidie Aruba ta contento di por aporta y brinda e ayudo necesario na e federacion di esgrima cu nan tradicional Arubaanse Kampioenschap 2018. Stichting Sportsubsidie Aruba a yuda subsidia e campeonato di esgrima durante henter anja.

Lotto, e loteria di Aruba ta ofrece diferente weganan manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana.

Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.