Award

Mario Lobo ta sigui domina e ranking overall 2019 den e deporte di tennis di mesa

D4S_7260.JPG

E federacion di tennis di mesa, Aruba Table Tennis tur luna ta keda activo unda ta hunga e torneo di ranking di cada luna pa asina e atletanan por defini nan posicion. Den e ultimo dos simannan aki a hunga e ranking di februari den e diferente categorianan. Mas cu claro un di e mas interesantenan ta A-klas unda Mario, Andy, Jeandry y Chingho ta bataya fuerte pa e prome posicion. Mester bisa cu un bes mas Mario Lobo ta dominante y ta bolbe sera un otro luna na prome lugar. E resultadonan final den ranking di februari ta como lo siguiente

Den e Cat U11 nos tin na 1er lugar Dylan de Leca, na di 2do lugar Ethan Fan y na di 3er lugar e keda Chase Fan. Den e Cat U18, na 1er lugar nos ta haya Jeandry Mathilda, na di 2do lugar Johnatan Paredes y na di 3er lugar Josielienne Boekhoudt. Den e Cat A Klas nos ta haya na 1er lugar, Mario Lobo, na di 2do lugar Jeandry Mathilda y na di 3er lugar Chingho Chung. Por ultimo nos tin e Cat B klas unda na di 1er lugar nos tin Wing Chow Leong, na di 2do lugar e keda James Letren y na di 3er lugar a keda Donald Yarzagaray.

Stichting Sportsubsidie Aruba ta contento di por aporta y brinda e ayudo na e federacion di Aruba Table Tennis pa cu nan actividad di Ranking 2019. Alabes ta felicita e atleta Mario Lobo cu ta lidera e table di posicion den 2019.

Prome competencia di Open Water Swimming celebrando Dia di Betico tabata un exito rotundo

AZB (1).jpg

Recientemente Aruba Swimming Federation, AZB a organisa e prome competencia di Open Water na cas di Roly Bisslik na Savaneta. Un total record di 91 landado a inscribi pa asina participa na e competencia cu tabata uno clasificatorio pa e Carifta Games cu e aña aki lo.tuma lugar na Barados. Mester bisa cu e mayoria a competi den e 1km y 3km, mientras un grupo selecta a dicidi di bay e 5km. E trajectoria sigur no tabata facil cu hopi coriente y biento pero asina mes tur hende a haci nan maximo esfuerso pa logra un bon resultado y tempo. E 1km a wordo gana pa Braynsly Dirksz mientras e 3km a wordo gana pa Elisabeth Timmer y e 5km a bay pa Lucien Peterson cu a triunfa anja pasa tambe den e mesun evento aki.

E comision di Open Water Swimming tabata hopi satisfecho cu e acohida di e prome competencia oficial clasificatorio di Open Water na Aruba. E landadonan a responde bon na e evento mientras e evento mes a cana soepel y segun schedule. E promixo competencia di Open Water lo ta rind dine celebracion di nos Himno y Bandera y esaki tambe lo ta un evento clasificatorio, e biaha aki pa e Central American and Caribbean Amateur Swimming Confederation, CCCAN.

Sportsubsidie Aruba ta contento di por aporta y brinda e ayudo necesario na e federacion di landamento cu nan prome actividad oficial di Open Water Swimming local na Aruba.

RESUMEN DI ANJA 2018 di 297sports PARTI 7

Deporte di Resistencia, Massa y Extremo tambe a briya den 2018

E deportenan di Resistencia, Massa y Extremo tambe e briya den 2018 unda mas y mas persona a dicidi di tuma e reto pa wak con bon realmente nan condicion fisico ta. Cada prueba riba su mes tabata pisa pero e statisfacion mas grandi ta ora e met wordo logra.

Total Trail Challenge powered by Total Services Aruba

E Total Trail Challenge powered by Total Services Aruba tabata un careda di 5km cu a pasa den e areanan pisa di Rooi Taki y Cunucu 297. Esaki sin duda tabata un careda cu a exigi hopi resistencia ficiso unda cada coredor a wordo getest riba nan condicion fisico. E careda aki tabata exitoso unda varios coredor elite di Aruba a bay pa e reto.

1st Annual Indian Enduro Race den Mountain bike

E 1st Annual Indian Enduro Race den mountain bike a tuma lugar den e propio Rooi Taki y becindario. Mas cu claro e recorido aki di 5km no tabata nada facil y tabata uno hopi heavy mes. Tipo di caredanan ta exigi cierto preparacion si kier logra resultado satisfactorio. Den e careda aki tambe hopi amante di MTB a challenge nan mes riba un pacour sumamente dificil.

Ambos evento a wordo organisa pa ViperStrong

Ronde van Aruba 2018

E 26 edicion di e Ronde van Aruba – MSK Savanetatabata magistral.

Cada aña e careda aki ta uno mas grandi y mas mihor cu un bon organisacion su tras. Tur anja nos ta experencia momentonan sigur inolvidabel den e Ronde van Aruba organisa pa OS&O MSK Savaneta. Momentonan bunita unda hopi grupo, duo y atletanan individual ta haci un sacrificio grandi pa logra un bon resultado.  E anja aki nos por a mira e coredorJoatham Kock y tambe Alwyn Lanoy cu ta momentonan cu a acapara nos atencion.

 

 

KLM Aruba Marathon

Den luna di juni e KLM Aruba Marathon a haci su debut na Aruba. Mester bisa cu un grupo grandi di canador y coredor a participa na e 5, 10, 21 y 42 kilometer den e area di Marriot, Malmok, Arashi y besindario. Team Sport Caribe Aruba a arasa den e KLM Aruba Marathon 2018. E grupo di atleta patrosina pa Sport Caribe Aruba, cas di e famoso marca mundial Adidas y Reebok a hasi un tremendo papel den e KLM ARUBA MARATHON 2018.

E 42km Full Marathon a wordo gana pa e coredor Jesus Galea(Galea Galea Galea), mientras e 21km Half Marathon a wordo gana pa e atletanan Amadee Nicolaas den e categoria femenino mientras Veronique Veronique ta keda na un di tres lugar. E atleta Romar Arendsz ta keda na di dos lugar den e categoria masculino y Al Kock den e top 8. E 10km a wordo gana pa Kelvin Gama GonzalezGonzales di Viper Strong den e categoria masculino. E 5km a wordo gana pa Zhyon Geerman tambe di Viper Strong. Tambe nos a haya un bon prestacion di henter e grupo di ViperStrong.

Urban Sport Caribe 5k Run

Jonathan Busby y Lana Golbert ta triunfa den e prome Urban Sport Caribe 5k Run.

Bou di un publica grandi di mirones, e prome edicion di e Urban Sport Caribe 5k Run a tuma lugar den Centro di Oranjestad. Alrededor di 450 participante a yega den oranan di atardi Sport Caribe pa asina participa na e Urban Run aki. A inicia cu e 1 Kids Mile Run unda varios mucha muher y homber a race 1.6km den Caya Grandi.

 

Despues a sigui cu e Urban Run and Walk recreativo y competitivo unda e core un total di 5 kilometer den e area di Oranjestad bou di un dushi ambiente. Aki e conocido coredor Jonathan Busby a logra gana e careda net dilanti Giannon Eights y Kelvin Gonzalez. Den e categoria femenino, e prome premio a bay pa Lana Gobert na di dos lugar a keda Kirah Regales mientras na di tres lugar a termina Pauline Vackier.

 

King of The Hill

King of the Hill hopi exitoso

Den un solo palabra pabien!!! E organisadornan di e magno evento King of the Hill por mira tras di un evento super exitoso. Na nos yegada por a ripara cu e King of the Hill lo bay haya su acohida mirando cu tanto e publico y e participantenan a responde den forma masal riba e invitacion. Tabata busca un doño di Hooiberg pero pa bira esaki mester a subi e sero mas liher posibel. Esun mas liher por a yama su mes King of the Hill. 

E hoben triatleta Giannon Eights a lo largo ta e persona cu a subi e sero di Hooiberg mas rapido marcando un tempo di 3.33 cual sigur ta hopi liher mes. No obstante di e awacero cu a basha un rato bastante duro y e trapinan di Hooiberg cu por slip un poco, esaki no a descurasha y stroba e competidornan di registra un bon tempo. Tur tabata determina pa e premio gordo cu tabata warda nan.

E fastest stair man, e Finlandes Mårten Boström a pone un show inolvidabel ora cu e la clock un tempo di 2 minuut y 59 seconde cual ta hopi liher mes. Mester bisa cu Jordy Vinck(3.46), Jorman Munos(3.52) y Romar Arendsz(3.54) ta esnan cu a finalisa tras di e hoben Giannon Eights.

 

Caminata di 4 dia di Aruba Bank

“E Caminata di Aruba” esaki ta e apodo pa e evento annual di Aruba Bank cu ta organisa nan caminata di 4 dia cu cada dia ta sali for di diferente area rond di nos isla. Un caminata cu ta hala mas cu 2500 persona tur anja y cu den un tempo record, kizas 4ora of menos ya ta Sold Out den inscripcion. Mirando e exito y cada bes improvisando con pa haci esaki cada bes mas mihor no tin duda cu den 2019 Aruba Bank su caminata lo bira  The Bomb.

Urataka Run 2018 presenta pa i-Run Aruba

E di dos Urataka Run cu i-Run Aruba a organisa sin duda tabata uno grandisimo. Riba e fecha di  Januari 13 tabata e 5K “URATAKA RUN & WALK”. Esaki originalmente tabata e di 20 edicion di “URATAKA RUN & WALK” cu a cuminsa y caba na Urataka Center/ Best Pizza. E “URATAKA RUN & WALK” a hasi uso di professional timing system mientras tur participante a ricibi su medaya.

 

Fitville 2018 tabata un reto grandi pa mayoria crossfitters den 2018

E Fitville 2018 sin duda tabata uno pisa cu hopi reto. For di e prome dia caba e participantenan mester a inicia cu nan prome ehercicionan mientras pa 10or di anochi tur cos a finalisa. Tur e dianan no tabata nada facil. E diferente ehecicionan a bira un berdadero pesadiya pa hopi participante. Cada buelta tabata manera un e reto nobo. E mayoria participante a tog purba finalisa den e tempo prescribi. E bataya contra holishi no tabata nada facil. E organisadornan di e Fitville a scohe e ehercicionan conciente y apto pa tur cu ta praktica Crossfit na tur nivel. Den 2019 ta premira un otro exitoso Fitville.

Deporte di landamento cu un super bon anja 2018

E anja 2018 tabata un tremendo anja pa nos landadonan di Aruba. Den tur tres disciplina esta landamento, artistic swimming y Open water, Aruba a san a briya formidabelmente.

 

CARIFTA

Den e Carifta Championship na Jamaica, landamento y artistic swimming a araza den medaya. Tanto Flory Kock, Keeley Maduro, Anahi Schreuders, Elisabeth Timmer y Daniel Jacobs ta logra gana medayanan di Oro, Plata y Brons.

Di nan banda artistic swimming den U12 nan ta logra gana varios medaya den e Carifta Swimming Championship na Jamaica y e nos seleccion senior ta logra clasifica pa e Weganan Centro Americano y del Caribe mientras e duet di Abigail y Anastacia ta logra un lugar riba e podium conkistando un medaya di plata.

 

CCCAN
Team Aruba ta titula campeon overall di CCCAN 2018

Nos seleccionnan di landamento, landamento artistico y Open Water cu a logra e prome lugar overall den e CCCAN 2018. Nos dushi isla di Aruba a host un di e campeonatonan mas grandi den nos region cu ta e Central American and Caribbean Amateur Swimming Confederation(CCCAN). Durante 12 dia largo 479 atleta for di 24 pais a competi contra di otro den e tres disciplinanan di landamento cu ta landamento artistico, landamento y Open Water.

Mester bisa cu e prestacion di team Aruba tabata uno formidabel esaki den tur tres disciplina. Tanto den landamento, landamento artistico y Open Water nos landadonan a subi podium ganando numeroso cantidad di medaya. Cu 1301.5, Aruba ta gana e competencia maximo di e CCCAN 2018, lagando paisnan grandi manera Trinidad and Tobago, Colombia, Panama y Costa Rica su tras. 

Notabel ta cu e seleccion di landamento artistico a arasa di premio unda a domina e competencia internacional. Cu nos 13 medayanan di Oro den e diferente categorianan conkista, e landamento artistico di Aruba a demostra cu nan ta keda un di e mihor paisnan den e region di Caribe y Centro America. E hobencita Mikayla Morales y e mas experiencia Kyra Hoevertsz a logra un total di 4 medaya di Oro cada uno mientras Zahira Varis, Annastasia van Daal, Kainah Croes y Abigail de Veer a logra dos medaya di Oro pa Aruba. Den team, Aruba ta logra medaya di Oro den e categorianan 12 & Under y 13 – 15 anja. 

Pa loke ta e landamento Aruba a termina na unda 3 lugar overall cu 12 medaya di Oro, 17 medaya di Plata y 12 medaya di Brons. E paisnan di Colombia y, Bahamas so a termina dilanti Aruba. Pa loke ta e prestacion di nos atletanan di landamento mester bisa cu e atleta Daniella van den Berg a logra triunfa cu 2 medaya di Oro mientras cu Patrick Groters a logra gana 2 medaya di Oro. Remarcabel ta cu Aruba sin duda tabata fuerte un bes mas den e estafette/relay caminda nos a landadonan a triunfa cu no menos cu 7 medaya di Oro. A logra esaki den e mixed relay 18+ cu Ally Ponson, Gaby Ponson, Jordy Groters y Patrick Gorters, den mucha homber 18+ cu a logra 3 medaya di Oro cu Mikel Schreuders, Jordy Groters, Patrick Groters, Derrick Bransford y George den Dunne, den mucha muher 18+ a logra 2 medaya di Oro cu Allyson Ponson, Gaby Ponson, Daniella van den Berg y Andrea van den Berg. Por ultimo nos a haya e categoria di mucha muher 15 -17 cu e cuarteto conoci como e Golden Girls cu a logra 2 medaya di Oro cu Keeley Maduro, Flory Kock, Elisabeth Timmer y Anahi Schreuders. 

Den Open Water nos landadonan a hasi un tremendo papel cu Daniela van den Berg, Flory Kock y Roland Fun como e landadonan cu a subi podium. E landado Daniela van den Berg a gana e competencia di 5km femenino y logra e medaya di Oro, Flory Kock a keda number 3 bon pa e medaya di Brons mescos Ronald Fun cu tambe a gana medaya di Brons den su categoria. Overall Aruba a keda na di 5 lugar den e competencia Open Water.

 

Weganan Centro Americano y Del Caribe BARRANQUILLA/CALI 2018

E landado Mikel Schreuders ta logra medaya di Plata mientras e duet di artistic swimming, Abigail de Veer y Kyra Hoevertsz ta logra e medaya di Brons pa Aruba.

RESUMEN DI ANJA 2018 di 297sports PARTI 5

Super bon anja pa Xander BogaertsDenzel Dumfries y Sarah Quita Offringa

Mas mihor no tabata por!!! Tres di Aruba su atletanan professional a simplemente briya den 2018. E pelotero Xander Bogaerts y Boston Red Sox ta logra gana e World Series di baseball, e futbolista Denzel Dumfries ta firma cu PSV y ta wordo selecta pa Seleccion Hulandes mientras nos orguyo femenino Sarah Quita Offringa ta gana su di 15 titulo mundial den PWA World Tour.

 

Xander Bogearts

Xander Bogaerts y Boston Red Sox ta gana Los Angeles Dodgers cu score di 5-1 den e ultimo wega pa asina sigura nan di cuater titulo di “World Series” den e ultimo 15 campeonatonan di Major League Baseball. Xander a bati den 2018 pa un averhae di .288 cu 148 hit y 103 RBI.

E logro di Bogaerts a haya hopi elogio riba nos isla unda Gobierno di Aruba a organisa un bunita celebracion pa Xander den Carnival Village na San Nicolas y a nombra Xander como Embahador di Bon Boluntad pa pais Aruba.

Denzel Dumfries

Ex seleccionado di Aruba, Denzel Dumfries a firma cu e gigantenan di PSV pa un suma di 5,5 miyon euro te cu 2023. Denzel a hunga e ultimo temporada cu SC Heerenveen. Esaki a trece cune cu Dumfries a bay progresa enorme y esaki a cay den bista di entrenador Ronald Koeman cu a selecciona Denzel Dumfries y pone debuta den seleccion Hulandes di futbol contra Alemania. Sin duda esaki tabata e cherry cu tabata falta ariba e bolo. Na e prome invitacion pa entrenador Koeman, ya caba Denzel lo debuta cu Oranje contra Alemania. Dumfries 4 anja pasa aiinda a hunga den e seleccion di Aruba pa despues hunga cu e club amateur Barendrecht, sigui pa e club profesionalnan Sparta Rotterdam, SC Heerenveen y PSV Eindhoven.

Sarah Quita Offringa

Nos orguyo Sarah Quita Offringa ta logra su di 15 titulo mundial na Fuerteventura, Islas Canarias. E orguyo femenino di Aruba ta gana su di 11 titulo mundial den Freestyle y un di dos lugar den Wave, cual ta e prome logro den Wave pa Sarah Quita. E anja aki Sarah Quita a skip slalom pa concentra su mes full den Wave. E anja 2019, Sarah Quita lo kier un bes mas concentra su mes den e disciplina di wave pa asina purba di logra un titulo mundial den esaki.


Campeonnan di Futbol y Baseball

Aruba campeon Latino Americano di baseball Junior League

Despues di 6 aña e baseball di Aruba ta regresa e Serie Mundial di Baseball Junior League na Taylor, Michigan, Merca. Tabata na 2012 cu casualmente Junior League a representa Aruba den un Serie Mundial di Baseball. Aruba a sa na vence e ekipo di Panama cu e score final di 15 – 4 den un marathon di baseball. Por cierto Panama a gana Aruba 1 den e wega inaugural 2 – 1 cual sin duda a demostra cu e dos ekiponan lo ta e dos faboritonan pa e titulo Latino Americano. E apoya grandisimo den stadion Nadi\Crismo na Sta Cruz a pone nos muchanan demostra e balentia y hunga un baseball ganado cu bateo oportuno y bon fildeo sin a duna espacio pa sorpresa. Na final e motor a start y nos muchanan a bay laga, sin laga duda atras. E alegria tabata inmenso cerca tur presente den stadion di Nadi/Crismo y claro cerca Panama e derota tabata bisto, cu lagrimanan di tristesa manera cualkier otro ekipo cu cay venci di e forma aki, specialmente den un final. Pa hopi aña Aruba su baseball Little League tabata warda un momento pa regresa e Serie Mundial y hopi biaha nos tabata asina cerca pero sin por a remata na final. Awe a keda demostra cu nos por atrobe pues ban pone cabes hunto y traha pa nos peloteronan. 

 

Sportvereniging Dakota ta logra titulo maximo den futbol despues di 23 anja

Conoci como un di e clubnan cu mas historia den nos futbol, e abehanan di Dakota porfin a logra nan meta tan anhela esaki bira campeon di futbol Division di Honor/Hoofdklas

Cu un score di 4 – 2, Dakota ta vence Nacional y pa asina pa cu e titulo.  Varios biaha nan tabata serca, pero suerte no tabata na nan fabor pero awor si nan a logre. E fanaticada a celebra den grandi na Stadion Guillermo P. Trinidad. A organisa un parada chikito cu a culmina na Centro di Bario y Deporte Dakota unda a celebra e victoria di e campeonnan di Aruba su division di honor.

 

Red Machine Baseball ta titula campeon di baseball AA di ABBA mientras un protesta no a caba e campeonato actual

Di loke mester a bira un bunita final di baseball AA di ABBA entre Red Machine y ATCO Indians a caba den un desapunto despues di e ultimo out pa Red Machine titula campeon ora a anuncia cu e wega ta bou protesta consecuentemente no por entrega e trofeo di campeon. Esaki sigur no a cay den bon tera serca e ekipo di Red Machine cu a cuminsa exigi nan trofeo. ABBA despues a eligi un directiva nobo y aki baseball a cuminsa riba bon pia pero yegando pa hhunga e playoff final, un bes protesta ta pone cu tur cos a para y atrobe baseball den su totalidad a perde.

Comite Olimpico Arubano a haci entrega di e merecido "medal bonus" na e atletanan cu a triunfa cu medaya.

Medal Bonus (1).jpg

Diasabra tabata un dia historico pa COA mirando cu pa prome biaha a otorga premio een forma efectivo na atletanan cu a logra triunfa cu medaya den e ultimo cuater weganan cu Team Aruba a competi na dje.

Dilanti un grupo di famia, miembronan di federacion, entrenadornan y invitadonan di honor a repasa e importancia di e medal bonus y tambe e exito di Team Aruba cu a cuminsa den luna di september 2017 cu e Weganan Sur Americano Hubenil te cu awor aki.

Secretaria General di COA, Sra. Nicole Hoevertsz a presenta e mainta aki unda su persona a pone enfasis riba e preparacion di atletanan, e preparacion di un mision olimpico. A conta con a proceso a inicia 20 aña pasa na e Weganan di Maracaibo y awe nos por disfruta di un exito grandi nunca bisto. Manera Sra. Nicole Hoevertsz a bisa durante di su prestacion; "E logro di nos 39 atletanan ta esun mas grandi den historia di nos deporte. Team Aruba a demostra cu aunke nos ta biba den un pais chikito y limita, nos por competi contra e paisnan grandi y gana medaya".

Desde 2017, nos a atletanan a logra conkista un total 15 medaya na e 4 Weganan bishita di cual 9 di Brons, 3 di Plata y 3 di Oro. Por ultimo a haci entrega di un bunita buket di flor na tur e premiadonan cu a ricibi un gran aplauso for di e publico presente. Na final e atletanan, miembronan di COA y hefenan di mision a wordo entrevista den un transmicion en bibo atrabes di Tele Aruba hunto cu 297sports y e team di media di COA.

HAZANA NAN di ANA 2018

Crossing for Hope: Venezuela – Aruba cu Deaxo Croes, Stephan Thijsen, Romar Arendsz, Davy Bisslik y e unico dama Gwendolin Kock.

“Crossing For Hope a uni nos comunidad pa un dia”. Esaki ta loke tur hende den nos comunidad a comenta despues di e fecha 11 di november unda e cinco landadonan Arubano, Deaxo Croes, Stephan Thijsen, Romar Arendsz, Davy Bisslik y e unico dama Gwendolin Kock a marca historia despues di a tuma e reto y corahe pa landa di Venezuela pa Aruba tur esaki pa un bon causa.

Nos comunidad a biba cu e magno evento aki unda Crossing For Hope a acapara e atencion debido di nos Pueblo. Den un combersacion ameno pero sigur tambe emocional, nos di 297sports hunto cu nos colega di Tele Aruba, Andrew Vrolijk a papia cu e cinco landonan y e maestro Roly Bisslik, 1 luna despues di e gran hazaña. Hopi storia nobo a bini padilanti pero e mas importante di tur pa e bon causa. E impacto riba nos hendenan y e union di nos Pueblo e dia aki tabata bisto.

Shariska Winterdal a cumpli cu e hazaña di 500km.

E multi atleta Arubano, Shariska Winterdal a sali di Linear Park pa despues di 24ora y 29min e regresa bek na e mesun caminda cu e la inicia cu un di e hazaña nan mas historico riba nos isla. Hunto cu su crew Shariska a core un total di 500km cual tabata 5 ronchi di Aruba riba su bicicleta. El a pasa den tur bario unda hendenan a aplaudi e bunita gesto aki. Na su yegada na Linear Park tabata dificil pa hopi presente contene nan emocion y lagrimanan. Tabata un momento di historia caminda tur hende a brasa otro y felicita pa e tremendo esfuerso y trabou di ekipo. Mas cu claro Shariska a dedica e hazana aki na e dos muchanan Huerfano na kende Stichting Frank Polanco lo haci e donacion recuada.

IRONMAN: ROMAR ARENDSZ

Romar den Crossing For Hope

Hunto cu 4 otro landado Romar a tuma e reto pa landa e distancia di 30km for di Venezuela bini Aruba. Un hazaña cu e carga e apodo di Crossing For Hope pa un bon causa. Romar a landa casi 36km pa e por a yega su isla den 10 ora den nos lama.

 

Romar den Ultra Ragnar SoCAl

Un di 2 lugar pa Team Aruba den e 300km Reebok Ultra Ragnar SoCal na Southern California. Un tremendo prestacion di nos coredornan di Aruba den e weekend ultimo cu e no menos cu 300km cori den e Ragnar Relay Race. Un di dos lugar den hopi participante ta bisa tur cos. Mas aun e lesion di Romar Arendz a pone cu e demas coleganan coredor mester a cubri e extra kilometrahe y a hasi esaki den bon forma respaldando nan colega Romar. Cueste loke cueste e careda mester a wordo finalisa. Romar a core un trajectoria cu un lesion basta pisa na su enkel, pero no kier a laga su coleganan na caya. Asina mes un di dos lugar a wordo logra. Hunto cu coleganan Melvin Dabian, Al Kock, Marcio Lopes Ribeiro, Ricky Refunjol y Joaquin van Trigt

Romar den 75km di Ronde van Aruba

E anja aki Romar Arendsz a dicidi di core e 75km di e Ronde van Aruba su so. Apoya pa su team e multi atleta Arendsz a presta formidabel y a sa na logra un tremendo resultado final. E trajectoria di Ronde van Aruba sigur no ta uno facil, e reto ta uno grandisimo mientras e oranan na pia ta riba 7 a 8 ora.

Romar den otro eventonan

Na banda di e 3 eventonan aki riba menciona, e multi atleta Romar Arendsz a logra complete e International Triathlon Curacao y Internartional Triathlon Aruba. E la core e 42km di e Marathon Miami, e 21km di e Half Marathon Aruba y e Aruba KLM Marathon.

 

IRONMAN: LARS STOLK

Otro multi atleta cu tambe e logra dos tremendo presentacion den dos evento extremo ta Lars Stolk cuu e participa den e Alaskaman Extreme Triathlon y Patagonman .

Alaskaman Extreme Triathlon

Prome Lars Stolk ta logra finalisa Alaskaman Extreme Triathlon 2018 den un tempo di
16 ora, 25 minuut y 33 seconden. Lars a logra termina na di 43 lugar di 187 participante.

 

Patagonman na Chile.

Lars a parrticipa den e Patagonman na Chile, un race cu a cuminsa cu 1 ora y 22 minuut landa den un awa super frieu pa sigui cu un 180km riba bicicleta cu tabata feroz cu un subida di 2.600m. Den 7 ora y 27 minuut, Lars a completa e 180km bike.Despues mester a core e marathon incluyendo dos cruse di rivier. Apesar di a crash despues di 30km asina mes Lars a sigui cu su careda cu rudia afecta unda a finalisa den 5 ora y 45 minuut.

Asina mes e la finalisa de un tempo final di 15:02:22, y un di 102 lugar di 215 participante.

Dos hazaña di 16ora riba ruta cual sin duda no ta nada facil.