Tang Soo Do

Delegacion di Tang Soo Do a gana varios medaya

12ad32bc-7bed-46a5-a11a-3e98e239f1cb.jpg

Delegacion di Tang Soo Do a gana varios medaya den e 17th Regional Championship di World Tang Soo Do Association na Panama

Diamars 9 di juli un delegacion di Aruba Tang Soo Do Federation y Gihae Tang Soo do Studio a sali pa un competencia 17th Regional Championship di World Tang Soo Do Association na Panama bou guia di Master Melissa Noguera. E campeonato ta wordo organisa dor di Region #18 Centroamericano y di caribe di WTSDA.  Tabatin varios pais compitiendo incluyendo Costa rica, Panama Puerto rico, Mexico, Merca y Aruba. Cu un total di 200 participante. E nomber di atletanan representado den e seleccion di  Aruba tabata Jaileen Tromp 1st Dan, Shanro Thomas 1st Dan, Joshua Paimino 2nd Dan y Gilberto Boerleider 3rd Dan. Cu solamenre 16 participante Aruba A logra un total di 21 medaya di oro, 11 medaya di zilver, 4 medaya di bronza, 4 grandchampion den faha di color, Grandchampion Junior Male Black Belt Division, Grandchampion Senior Male Black Belt Division

Stichting Sportsubsidie Aruba ta contento di por aporta y brinda e ayudo na e federacion di Aruba Tang So Doo Federation pa asina nan por a competi den e 17th Regional Championship di World Tang Soo Do Association na Panama.

Simpocio y competencia internacional di World Tang Soo Do

Hapkido (4).jpg

Aruba Tang Soo Do / Aruba Hapkido Association a asisti simposio international na Viña del Mar, Chile.

Recientemente un delegacionan di Aruba Tang Soo Do/Aruba Hapkido Association a biaha pa Santiago de Chile unda a atende un simpocio y competencia internacional di World Tang Soo Do General Federation ( Moo Duk Kwan Korea) y e associacion Pan Americano di Tang Soo Do Bi Sang Kwan (Sur America y Caribe). A atende e simpocio y competencia delegacionnan for di Korea, Malasia, Panama, Puerto Rico, Corsow, Argentina, USA, Brazil y mas cu claro Aruba. Nos delegacion a wordo representa pa Sr. Richard Vrolijk.

E topiconan trata riba e 3 dianan di simpocio tabata entre otro e formanan (hyungs) nobo for di Korea, combionan di reglamento ora di combate, p.e. ta wordo permiti awor pa tene, bari bo oponente pone ariba piso y finalisa cu un mokete, 3 tecnica den 1 accion pa un Ippon (punto completo). Cambio den duna punto p.e. 1,2 y 3 punto depende di e area di combate y tecnica uza. Otro tema cu a tuma basta tempo tabata e standarisacion di e formsnan(Hyungs). Dor cu a constata algun diferencia (minimo) dor di differente instructornan a dicidi aña pasa na November na Korea pa pone esaki como punto di agenda. Puntonan concretisa di e simpocio tabata e standarisacion di e formanan, un posibel curso di referee, y e cedenan pa e siguiente eventonan. Ta asina cu a scoge e combinacion Corsow -Aruba pa e competencia internacional na aña 2020.

A clausura e evento cu un campeonato international unda Aruba a wordo representa pa Ksn Bas Stock actualmente studiando na Hulanda. Ksn Stock a gana y perde un combate na Chile. Master Richard Vrolijk y bestuur di Aruba Hapkido Association - Aruba Tang Soo Do tabata masha contento cu e oportunidad di por a realisa e biahe pa Chile.

Stichting Sportsubsidie Aruba ta contento di por aporta y brinda e ayudo necesario na e Aruba Tang Soo Do / Aruba Hapkido Association a asisti simpocio internacional na Viña del Mar, Chile Stichting Sportsubsidie Aruba a yuda subsidia e biahe di presidente Master Richard Vrolijk pa e simpocio di Tang Sooo Do na Chile.

Delegacion a sali pa e World Tang Soo Do Argentina Championship 2018

079558f3-db8d-4359-898e-23320b98434b.jpg

Delegacion di Gihae Tang Soo do Studio a sali pa e World Tang Soo Do Argentina Championship 2018 na Buenos Aires, Argentina.

Riba e fecha di 14 di november ultimo, World Tang Soo Do Association a celebra e hecho cu nan a cumpli 36 aña di existencia. Pa cu e celebracion aki un delegacion di Aruba Tang Soo Do Federation y Gihae Tang Soo do Studio a sali pa e competencia Suramericano na Buenos Aires Argentina, bou guia di SBN Melissa Noguera. E campeonato ta wordo organisa dor di Region #23 South America di WTSDA. E campeonato ta yama World Tang Soo Do Argentina Championship 2018 cu ta celebra nan 30 aña di existencia.

Mester bisa cu varios pais lo competi na e campeonato incluyendo Argentina, Chile, Ecuador, Merca y Aruba. E atletanan cu lo representa Aruba ta Gilbert Geerman y Iriëla Kelly ambos 1ste Dan. Prome cu competenicia lo tin un cena celebrando 30 aña di existencia di WTSDA ARGENTINA. E competencia mes lo tuma lugar Diadomingo 18 di November na Buenos Aires.

Lotto, e loteria di Aruba pa medio di Stichting Sportsubsidie Aruba a yuda subsidia e delegacion di Aruba Tang Soo Do Federation y Gihae Tang Soo do Studio pa e competencia Suramericano na Buenos Aires, Argentina.

Master Melissa Noguera a atende clinica di World Tang Soo Do Federation

673fa6c3-aee9-455a-9238-fa4770dc6dc5.jpg

Recientemente Master di Aruba Tang Soo Do Federation, Melissa Noguera a biaha pa Huntsville, Alabama pa e di 29 edicion di e Masters Clinic organisa pa World Tang Soo Do Association. E master clinic aki a tuma lugar e dianan 22 pa 24 di maart. E tema di e master clinic e anja aki  tabata perseverancia. Na banda cu e haya diferente informacionnan valioso relaciona cu e team a haya tambe entrenamento den e diferente disciplinan di Tang Soo Do. Parti mainta mester a sigui cu e entrenamento den ki kong ( training di energía di chi). A haya entrenamento di diferente senior master di entre otro Inglaterra, Merca, Hulanda den tecnica y forma di spada di 5de Dan Master. E parti di Sparring, fighting fan drills, training di Tricks cu Bo staff, inovacionan den training di sparring, open hand forms pa e siguiente faha di 5de Dan. Pero tambe a haya entrenamento di tur e formanan Basico di Grandmasternan. Cada entrenamento tabata tin un duracion di 2 ora pa dia, sigui [a diferente charla te lat den anochi. Mester bisa cu a inicia cu charla pa un grupo special di tur e masternan di Latino America y Caribe. E continuacion di sigui e desaroyo di Tang Soo Do di serca ta importante pa Master Noguera por sigiu cu implementacionan y desaroyo den e arte y deporte aki.

Stichting Sportsubsidie Aruba ta subsidia e biahe di master Melissa Noguera pa e Masters Clinic organisa pa World Tang Soo Do Association na Huntsville, Alabama.

Aruba Tang Soo Do Federation lo celebra Dia di Betico 2018

23167974_725367470993628_2680853061064024460_n.jpg

Diahuebs awor 25 di Januari, riba Día di Betico, Aruba Tang Soo Do federation conhuntamente cu tur e scolnan di Gihae Tang Soo Do Studio Aruba lo organisa Copa Betico Croes 2018. Esaki lo ta un torneo cu lo ensera Hyungs (forma libre) y weapon hyungs ( forma cu arma). Participacion ta tur alumno cuminsando di 2,5 aña di edad. Ta spera un participacion masal di e atletanan afilia na e federacion di Tang Soo Do Aruba. E competencia ta programa pa cuminsa 9or di mainta y na e cas di Tang Soo Do esta Emma School na Ayo.

Mester bisa cu Aruba Tang Soo Do Federation ta un federacion hopi activo conoci pa su triunfonan sin lubida su actividadnan organisa riba tereno internacional. Aña pasa e organisacion a host e di 16th World Tang Soo Do Regional Championship Aruba cual sin duda tabata ta un exito rotundo. E campeonato aki tabata di taya mundial mirando cu paisnan manera Puerto Rico, Costa Rica, Panama, Nicaragua, Hulanda y Merca, sin lubida nos propio atletanan di Aruba a participa na esaki. Es mas Aruba a ricibi bishita di e Grandmasternan di World Tang Soo Do, Kwan Chang Nim Strong y Kwan Chang Nim Beaudion como tambe Regional Director Master Wilfredo Burgos.

Un danki sigur na Lotto, e Loteria di Aruba pa medio di Stichting Sportsubsidie Aruba cu a subsidia e eventonan deportivo enconexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.

Gihae Tang Soo Do lo organisa un competencia di tiny trigers, little dragons juniors y seniors

13516634_507697799427264_2298235703211943039_n.jpg

Diadomingo awor 5 di november, Gihae Tang Soo Do lo organisa un competencia pa tur miembronan cuminsando for di e edad di 2 aña bai ariba. E competencia ta pa tiny tigers y little dragons lo forma y ranca faha. Den juniors y seniors Hyungs esaki lo ta forma liber, Weapon Hyungs den forma cu arma y tin tambe sparring. Lugar lo ta den e gymzaal di Emmaschool na Ayo y lo inicia pa 9or di mainta.

Gihae Tang Soo Do ta un organisacion hopi activo na Aruba y ta conta cu varios miembro. Riba tereno internacional nan ta conta cu un admiracion grandi. Recientemente nan a tene e di 16 edicion di e World Tang Soo Do Regional Championship Aruba 2017 na Aruba mes cu a conta cu participacion di varios pais rond mundo manera Puerto Rico, Costa Rica, Panama, Nicaragua, Hulanda y Merca y mas cu claro Aruba. Es mas, Aruba a ricibi bishita di e Grandmasternan di World Tang Soo Do, Kwan Chang Nim Strong y Kwan Chang Nim Beaudio cu a bin presencia e campeonato aki. Na banda di e campeonatonan realisa y bishita, Gihae Tang Soo Do ta organisa diferente workshop pa nan miembronan pa asina keda na altanto di henter e desaroyo rond di e deporte di Tang Soo Do.

Un danki sigur na Lotto, e Loteria di Aruba pa medio di Comision di Subsidio cu a yuda subisdia e competencia di tiny trigers, little dragons juniors y seniors organisa pa Gihae Tang Soo Do enconexion cu e celebracion di e ASU Olimpiada 2017.

Aruba Tang Soo Do Federation ta host e 16th World Tang Soo Do Regional Championship Aruba 2017

Majan diasabra lo inicia na Aruba un otro evento deportivo di taya mundial riba nos isla ora cu e federacion di Aruba Tang Soo Do organisa e di 16 edicion di e World Tang Soo Do Regional Championship Aruba 2017. Esaki sigur ta un campeonato grandisimo y di taya mundial mirando cu paisnan manera Puerto Rico, Costa Rica, Panama, Nicaragua, Hulanda y Merca,sin lubida nos propio atletanan lo competi contra di otro den e deporte di Tang Soo Do. Ta ser spera un total di 125 atleta cu lo participana e campeonato regional aki. E competencia lo tuma lugar na Renaissance Convention Center y lo conta cu e bishita di e Grandmasternan di World Tang Soo Do, Kwan Chang Nim Strong y Kwan Chang Nim Beaudion como tambe Regional Director Master Wilfredo Burgos.  Na banda di e competencia lo tin tambe otro actividadnan di Tang Soo Do manera workshop, Black Belt examen y Ki Kong Training. E evento ta premira di bira uno gradisimo y lo inicia pa 10or di mainta.

Sin duda esaki ta un otro bunita propaganda pa e deporte di Aruba, specialmente e deporte di Tang Soo Do cu un bes mas ta host un campeonato di halto nivel riba nos isla.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e di 16 edicion di e World Tang Soo Do Regional Championship Aruba 2017.

Aruba ta logra un total di 9 medaya den e XIX World Tang Soo Do Association Costa Rica International Championship

Diasabra ultimo un delegacion den e deporte di Tang Soo Do a competi exitosamente den e XIX World Tang Soo Do Association Costa Rica International Championship. Den e campeonato aki cu a conoce un total di 21 scol participante di diferente pais manera Costa Rica, Argentina, Panama, Nicaragua, Puerto Rico y Aruba, nos atletanan a haci un tremendo papel. Remarkabel ta cu nos atletanan di Aruba a competi den un sala cu otro 192 atleta. E categorianan den cual nan a competi tabata Bong Hyung (forma cu arma), Hyung ( forma liber) y Sparring (pelea). Despues di a duna un bon presentacion Aruba a bin cu un total di 9 medaya y dos Youth Black Belt Grand Champion. E atleta Marlivienne Lampe a logra triunfa den prome lugar Bong Hyung,un di dos lugar den Hyung y un di prome lugar den Sparring. Por ultimo e ta logra Campeon femenino categoria cinturon negro Junior. Un otro atleta cu tambe a destaca sin duda ta Gilbert Geerman cu a gana un di dos lugar den Bong Hyung, un di tres lugar den Hyung y un di tres lugar den Sparring. Gilbert tambe ta bira Campeon masculino categoria cinturon negro Junior. Por ultimo nos ta haya Cory Aragon kende a logra triunfa cu un prome lugar den Bong Hyung,un di dos lugar den Hyung y un di prome lugar den Sparring.

Diaki banda Lotto kier a felicita Marlivienne Lampe, Gilbert Geerman y Cory Aragon como tambe na Master Melissa Nogueray Aruba Tang Soo Do Federation & Gihae Tang Soo Do studio cu e tremendo prestacion den e  XIX World Tang Soo Do Association Costa Rica International Championship.