Internacional

Alvin Howell y Daniel Diaz lo competi den e Campeonato Panamericano Amateur di ahedres

Daniel-Diaz-y-Alvin-Howell.jpg

Recientemente dos atleta di ahedres a biaha pa e ciudad di Panama City unda nan lo competi den e Campeonato Panamericano Amateur den e deporte di ahedres. E campeonato na Panamericano Amateur lo wordo hunga den 3 categoria unda e dos hungadornan representando Aruba esta Alvin Howell y Daniel Diaz di Aruba lo participa den e categoría Sub-1700. Diahuebs ya e inicia cu e prome rondanan mientras e diamars awor dia 6 di november e torneo lo clausura cu e entrega di premio.

E deporte di ahedres tambe e conoce un crecimento durante e anjanan cu a transcuri, e oportunidad pa competi na nivel regional, continental y mundial a presenta mientras nos atletanan ta resalta logrando premio. Den 2018, Aruba su delegacion hubenil a san a gana varios premio den e Carifta Chess Championship na Surnam. Dos siman atras. Aruba a logra un bon papel den e torneo internacional di ahedres “Aruba Chess Challenge 2018” unda e hobencita Thamara Sagastegui a triunfa den e categorianan U12 y U18. Asina nos por mira cu e deporte mental no solamente ta yuda nos hobennan den nan pensamento pero tambe nos ta logrando premio den exterior.

Lotto, e loteria di Aruba pa medio di Stichting Sportsubsidie Aruba a yuda subsidia e biahe di e hungadornan Alvin Howell y Daniel Diaz pa e Campeonato Panamericano Amateur di ahedres na Panama.

Competencia di Feria Internacional Interpaso na Aruba

21731428_704646779732364_8887532598880596127_o.jpg

Pa di 33 biaha lo organisa e competencia di Feria Internacional Interpaso na Aruba.

Den e fin di siman benidero, Villa Floralina, lo ta un bes mas e cas di e Feria Internacional, Interpaso 2018. E feria ta uno mundialmente conoci y e biaha aki atrobe ta premira un asistencia grandi pa loke ta e participacion internacional pa e competencia di cabay na Aruba. Durante tres dia largo cuminsando diabierna awor lo bay tin competencia den tur modalidad sin lubida e ambiente unico cu e Feria Internacional di Paso Fino so por ofrece.

Mester bisa cu pa varios luna e Organisacion Caballista Arubano, OCA ta preparando pa e competencia di cabay mas grandi riba nos isla. Nos propio competidornan local ta cla pa e competi contra e mihonan den nos region. Paisnan participante na e Interpaso 2018 lo ta Colombia, Republica Dominicana y Corsow. Nos amazona y jinetenan semper a duna bon presentacion y logra premionan grandi den e competencianan di Interpaso teni na Aruba. E anja 2018 te cu awor aki, Aruba su amazona y jinetenan a conoce un tremendo temporada unda nan a sa na triunfa cu varios titulo di taya den competencianan internacional teni entre otro na Merca y Colombia cu ta paisnan conoci pa e deporte di Paso fino.

Lotto, e loteria di Aruba pa medio di Stichting Sportsubsidie Aruba a yuda subsidia e competencia di Interpaso 2018 organisa pa Organisacion Caballista Arubano(OCA).

E di 17 edicion di e Aruba Dolphins Invitational e fin di siman aki

6M7A9155.JPG

Pa di 17 aña e club di landamento Aruba Dolphins lo organisa un di e competencianan di landamento mas prestigioso na Aruba esta e Dolphins Invitational. Mester bisa cu cantidad grandi di landadonan procedente di Colombia, Bonairo, Curacao, Venezuela y Aruba lo bataya den awa contra otro e weekend aki. E cantidad di participante ta grandi, ta ser spera alrededor di 150 atleta lo competi den e ADI 2018. Mester bisa cu nos atletanan di Aruba for di scolnan manera Stingray Swimming, Orca’s y sin lubida Aruba Dolphins Swimming mes ta cla pa midi forza y demostra cu Aruba ta un di e paisnan mas fuerte den e region di Caribe pa loke ta e deporte di landamento. Nos landadonan pa varios anja ta representa Aruba den e diferente compeetencianan den e region y continente y semper a logra acapara e atencion logrando varios premio pa Aruba. Actualmente Aruba tin varios landado ta biba na principalmente na Merca unda nan ta combina nan estudio y nan deporte preferi.

E competencia di Aruba Dolphins Invitational lo cuminsa diabierna anochi mientras diasabra y diadomingo e competencianan lo sigui den e Piscina Olimpico Roly Bisslik na Savaneta.

Lotto, e loteria di Aruba pa medio di Stichting Sportsubsidie Aruba a yuda subsidia e Aruba Dolphins Invitational 2018 organisa pa Aruba Dolphins Swimming Team.

Giovanni Arendsz Classic - IFBB Elite Amateur & Pro Competition 2018

D4S_7452_.jpg

Giovanni Arendsz Classic - IFBB Elite Amateur & Pro Competition 2018 lo tuma lugar 26 di augustus proximo

E dianan 25 y 26 di augustus proximo, Aruba un bes mas lo ta anfitrion di un competencia grandi di bodybuilding & fitness cu lo conta cu un elenco mundial. Pa prome biaha lo organisa e Aruba Giovanni Arendsz Classic cu lo bira un elite pro qualifier event.

"E competencia aki ta un soño pami. Hopi aña mi kier a organisa un evento profesional cu atletanan di bodybuilding di tur parti di mundo. Mi a haci hopi pa e deporte aki y mi a logra masha hopi mes cu e deporte di bodybuilding y pesey un campeonato cu lo carga mi nomber", Giovanni Arendsz a bisa.

E ballroom di Aruba Marriot Hotel & Stellaris Casino lo host e magno evento aki. E pesahe combina cu un seminario pa Juez lo ta diasabra 25 di augustus mientras e competencia mes lo ta diadomingo 26 di augustus cuminsando mainta pa e amateurnan mientras anochi lo ta e elite pro nan. E amateurnan cu triunfa lo por competi anochi cu e profesionalnan. Un total di 24 pro-card lo ser reparti na e competencia aki. E campeonato internacional Aruba Giovanni Arendsz Classic lo conta cu participacion di entre otro atletanan di Poland, Zimbabwe y Russia y sin lubida Aruba mes.

Nos atletanan di bodybuilding & fitness sigur lo ta bon prepara pa e competencia internacional aki. Lo tin hopi nomber conoci y Aruba semper a logra duna bon presentacion den competen-cianan internacional. Algun siman atras nos atletanan a logra varios premio den un competencia di taya na Mexico.

Manera Giovanni mes a indica; "Cu e campeonato aki un berdadero soño a bira realidad".

Lotto cu semper a kere den e capacidad di nos atletanan ta masha contento di por aporta na un evento internacional di deporte organisa riba nos isla cu lo conta cu un participacion grandi di atletanan di tur pais rond mundo.

Tenista Alexson Hessels lo competi den varios torneo na nivel internacional

Alexson.jpg

Actualmente un delegacion di tennis ta na Bahamas unda nan ta competiendo den un torneo organisa pa e federacion mundial di tennis, International Tennis Federation. E hoben tenista elite di Aruba, Alexson Hessels ta representa nos isla den e Junkanoo Bowl G4 Tournament. Na 2017, e hoben Alexson Hessels a conoce un bon temporada den e deporte di tennis sigur despues di e termina na un di tres lugar den e Junior Davis Cup. E hoben tenista lo hunga varios torneo den exterior manera e ITF Grade 4 Junkanoo Bowl na Bahamas mientras cu 1 siman despues e lo competi den un torneo na Merca, yama USTA na Miami. Por ultimo Alexson Hessels lo tin su ultimo torneo na Republica Dominicana, esaki e dianan 16 pa 20 di juli proximo. Aki e lo hunga den e ya conoci ITF Grade 4 Copa Merengue. Ta bon pa bisa aserca cu coach Jonathan Goitia ta e coach engarga pa e bon guia di Alexson mientras cu Alexson lo wordo acompaña pa algun tenista di nos islanan ruman Corsow y Boneiro. 

Stichting Sportsubsidie Aruba a yuda subsidia e biahe di e tenista Alexson Hessels pa e diferente torneonnan internacional di tennis cu lo tuma lugar na Bahamas, Merca y Republica Dominicana. Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.

Torneo internacional di tennis, TIHTA edicion number 32

tennis (38).JPG

Torneo internacional di tennis, TIHTA edicion number 32 lo ta fin di e luna aki na Aruba

Tur aña den luna di juni/juli nos dushi isla tin e honor di host un di e torneonan di deporte mas prestigioso organisa na Aruba esta e TITHA Tennis Tournament. Pa Aruba Lawn Tennis Bond esaki lo ta e di 32 edicion cu e torneo di tennis TIHTA lo ser organisa na Aruba y un bes mas e lo conta cu un participacion masal di tenistanan di exterior como tambe e participacion di nos propio tenistanan hubenil.  Torneo Internacional di Tennis Hubenil Aruba ta uno reconoci y supervisa door di e federacion mundial di tennis International Tennis Federation y porcierto e unico torneo na Aruba unda tur hungador participando por acumula punto pa loke ta a ranking di COTECC, cual ta e ranking oficial di America Central y Caribe pa esnan di 14 aña of menos. E otro categoria cual ta esun bou di 18 aña lo por acumula punto pa e ITF ranking.

E competencia internacional di tennis mas cu claro lo tuma lugar riba e bunita canchanan di Aruba Raquet Club. Lo spera un cantidad grandi di tenista hoben for di tur parti mundo manera Trinidad & Tobago, Venezuela, Colombia, Surinam, Brasil, Polen, China, Japon, Australia, Merca,Russia, Bahamas,  Barbados y Aruba.

Pa loke ta e participacion di nos tenistanan local mester bisa cu nan ta bon prepara pa e torneo aki y ta spera di por trece sorpresa grandi. Dos aña pasa e tenista Arubano Kyle Frankel a marca historia pa Aruba door di bira e prome tenista Arubano hubenil cu e logra gana e torneo di tennis TIHTA den su categoria.

Stichting Sportsubsidie Aruba tambe a yuda subsidia e di 32 edicion di e torneo internacional di tennis TIHTA organisa pa Aruba Lawn Tennis Bond.

E di 16 edicion di e Aruba Dolphins Invitational lo inicia diabierna awor

IMG_5699.jpg

Pa di 16 aña e club di landamento Aruba Dolphins lo organisa un di e competencianan di landamento mas prestigioso na Aruba esta e Dolphins Invitational. Mester bisa cu cantidad grandi di landadonan procedente di Corsow, Republica Dominicana, Venezuela, Bonaire, Merca y Aruba lo bataya den awa contra otro e weekend aki.

E cantidad di participante ta grandi. Un total di 199 atleta lo competi den e ADI 2017. Mester bisa cu nos atletanan di Aruba for di scolnan manera Stingray Swimming, Orca’s y sin lubida Aruba Dolphins Swimming mes, ta cla pa demostra pakiko Aruba ta wordo considera un di e miho paisnan di landamento den e region di Caribe. Den e ultimo competencia internacional na Chile, e atleta prospecto Keeley Maduro a sa na logra un medaya di brons den e Weganan Suramericano Hubenil. Nos mester ta orguyoso di e prestacion di nos atletanan di landamento. E competencia di Aruba Dolphins Invitational lo cuminsa diabierna 7or y lo sigui riba diasabra y diadomingo. Mas cu claro e evento lo tuma lugar den e Piscina Olimpico Roly Bisslik na Savaneta.

Un danki sigur na Lotto, e Loteria di Aruba pa medio di Comision di Subsidio a yuda subisdia e di 16 edicion di e Aruba Dolphins Invitational.

Di 31 Aruba internacional triathlon

Aruba Triathlon Association a organisa dia 25 di juni ultimo e di 31 ArubaInternacional Triathlon. A participa total 116 atleta di Aruba, Venezuela, Merca, United Kingdom, Nowegia y Suriname a competi cu otro den landamento, ciclismo y coremento. Esnan cu a competi den e distancia olympico mester a landa 1.5 km, después core 40 km riba bais, sigui door di core 10 km na pia. E distancia sprint tabata net mitar di e ditancia olympico.

E landadornan tawata guia y controla door di boluntario den kayak y boto di polis. E evento a tuma lugar na Eagle Beach den becindario di Tulip Restaurant/MVC Eagle Beach. E ruta di ciclismo tawata e buelta entre Costa Linda Beach Resort y Divi Aruba Phoenix Beach Resort. Pa loke ta e careda na pia, esakia tuma lugarentre Screaming Eagle y Amsterdam Manor Beach Resort. Full e circuita tawata sera y controla pa polis y boluntarionan.

 

E ganadornan di e distancia olympico masculino:

  1. Renze Postma di Aruba den 1:57:44
  2. Leonald Heredia di Venezuela den 2:07:38
  3. Romar Arendsz  di Aruba den 2:07:51
  4. Marc Ingwersen di Aruba den 2:24:39
  5. Lars Stolk di Aruba den 2:25:41

 

E ganadornan di e distancia olympico femenino:

  1. Fiama Rodriquez di Venezuela den 2:27:39
  2. Rosa Martinez di Venezuela den 2:29:20
  3. Linda Smith di Aruba den 2:32:49
  4. Sandra Postma di Aruba den 2:40:21
  5. Diana Postma  di Aruba den 2:48:37

 

Distancia olympico team di relevo e resultado tawata: 1 lugar e team di Nayeli Tromp, Gabriel Thielman y Jesus Galea den 2:02:25, di 2 lugar e team di Gwennandy Kock, Thomas Hodge y Nathan Janse den 2:07:02 y na di 3 lugar e team di Flory Kock, Jair Kelly y Jonathan Busby den 2:08:41.

 

E ganadornan di e distancia sprint masculino:

  1. Bob van der Marel di Aruba den 1:09:02
  2. Anthony Wilson di Aruba den 1:09:03
  3. Johny Cheng di Aruba den 1:18:15

 

E ganadornan di e distancia sprint femenino:

  1. Shariska Winterdaal di Aruba den 1:26:56
  2. Stephany Wever di Aruba den 1:29:12
  3. Yvette Franssen di Aruba den 1:31:33

Gradecimento ta bay na e grupo di Arumil cu tawata diasabra atardi, 24 di juni, pa yuda cu setup di e lugar pa e evento y diadomingo cla pa duna un man un biaha mas pa ruim op tur cos ora e evento a caba!

Danki ta bay na tur e BOLUNTARIONAN cu a lanta e diadomingo mainta ey bon trempan pa duna un man na e evento exitoso aki!!

No por keda sin gradici e MC Roberto Geerman, Harley Bikers y tambe e mayor-, famia- y amigonan cu a bin apoya e participantenan.

Danki special ta bay na e fotografonan Anno Postma, Bo Potret y Seever Krozendijk/297 sports.

Aruba Triathlon Association kier a gradici su sponsornan Lotto pa Deporte, Tri-bike Aruba, Albo Aruba N.V., Caribbean Critical Communication, Amsterdam Manor, Tulip Restaurant, Subway, WEMA y Aledda N.V. pa a patronisa e di 31 Aruba International Triathlon.