Taekwondo

Campeonato Nacional Dia di Betico Kyorugi

TKW.jpg

Aruba Taekwondo Association lo organisa Campeonato Nacional Dia di Betico Kyorugi diasabra 19 di januari den Centro Deportivo Frans Figaroa

Diasabra awor scolnan miembro di Aruba Taekwondo Association Aruba, lo bini hunto den Centro Deportivo Frans Figaroa unda lo bataya pa e prome campeonato di anja cu lo bay ta e Campeonato Nacional Dia di Betico 2019. Mester bisa cu e atletanan por participa segun categoría, edad, grado y division. Lo bay tin exhibición bou 6 aña minimo faja blanco, Infantil 9 - 11 aña minimo faja blanco, grado y peso Cadet 12 - 14 aña minimo faja blanco Pesaje, Hubenil (Junior) 15 - 17 aña minimo geel Pesaje, Mayor (Senior) 18+ aña minimo faja blanco Pesaje.

Mester bisa cu e Ceremonia di Apertura lo ta pa 9or di mainta mientras na final lo haci entrega di e demas premionan. Lo tin premiacion pa Kyorugi den cada categoría 1° lugar - medaya 2° lugar - medaya 3° lugar, lo premia tambe mihor atleta infantil feminino y masculine, Cadet femenino y masculine, Junior, femenino y masculino, Senior femenino y masculino y lo premia tambe e Best Team.

Taekwondo den e ultimo anja nan aki ta den un desaroyo formidabel unda nos atletanan ta presta den gran forma den torneonan local y internacional. Nos ta logrando premionan grandi den exterior unda tin hopi wowo riba e prestacion di nos atletanan. Recientemente e atleta Zahyon Klaber a logra gana e campeonato Hulandes di taekwondo.

Stichting Sportsubsidie Aruba ta contento di por aporta y brinda e ayudo necesario na e federacion di taekwondo pa cu nan prome campeonato nacional y nan calendario di actividad 2019.

E mihor ekipo den e Aruba Caribbean Classic Taekwondo 2018

Lotto ta felicita San Nicolas Taekwondo Center a mihor ekipo den e Aruba Caribbean Classic Taekwondo 2018.

Lotto semper a sostene e deporte di combate, taekwondo mirando cu den e ultimo anjanan, e deporte aki ta un di esnan cu mas ta sobresali y mas premio ta conkista pa Aruba den exterior. Den e fin siman tras dii lomba, e scol di Master Eric Barry esta San Nicolas Taekwondo Center a bira ganador absoluto di e prome edicion di e Aruba Caribbean Classic Taekwondo 2018 organisa pa Brazil Taekwondo Stichting di Sr. Alberto Klaber.

Por a mira un gran cantidad di mucha den tur edad cu ta praktica e deporte di taekwondo. E scolnan participante San Nicolas Taekwondo Center, Impact Taekwondo Stichting, Brazil Taekwondo Stichting, Stichting Tiger Taekwondo Academy, Aruba Taekwondo Academy, E.T.U Taekwondo y Noord Taekwondo Center a conoce un crecimento pa loke ta miembronan nobo. No por keda sin menciona e asistencia grandi di parti di mayornan presente na e torneo aki. Mayornan sin duda ta esnan prome yama pa apoya y sostene e prestacion di nan yiunan den cualkier evento deportivo cu nan participa na dje.

Director di Stichting Fundacion Lotto pa Deporte, Sr Di Stefano Wernet tambe tabata presente e mainta aki y a dirigi su mes na tur esnan presente elogiando e atletanan y e deporte di taekwondo. Mas cu claro un pabien na Sr. Alberto Klaber y su scol Brazil Taekwondo cu un bes mas a sa na organisa un tremendo torneo pa tur e scolnan di taekwondo na Aruba. Na final Sr. Wernet a haci entrega di e premionan na e respective ganadornan esaki den presencia di presidente di ARTBO, Sr. Guaicapurro Jimenez.

Lotto ta felicita Grand Master Chaco Cornelio

19225686_667680660095643_2119374429849545475_n.jpg

Lotto ta felicita Grand Master Chaco Cornelio Hall of Fame y Director di Hall of Fame pa e region Caribe

Recientemente Presidente di Hall of Fame, Grand Master Gerard Robbins a recorda su boardmembers con e conocido ex- dirigente y referee internacional di taekwondo, Grand Master Jose “Chaco” Cornelio a keda eligi den e Hall of Fame World Taekwondo como tambe ta e Director of Hall of Fame pa region Caribe. Esaki sin duda ta e nombracion mas grandi pa un atleta, coach, dirigente of referee di deporte por haya na nivel mundial. E ta un honor di a wordo nombra pa e federacion mundial di taekwondo, WT pa forma parti den e prestigioso Hall of Fame mei mei di tur e grandinan cu a carga e deporte di combate pa asina hopi anja y 2 anja atras e keda eligi como e Director di Hall of Fame Caribe. Anja pasa Grand Master Cornelio tabata nomina pa e federacion mundial di taekwondo, WT pa e categoria Miho Referee Masculino 2017.

Pa taekwondo y Aruba sin duda esaki ta un logro super grandi mirando e magnitud di e deporte den e otro paisnan menciona si nos compara esaki cu Aruba. Un bes mas a keda demostra cu maske nos ta un pais chikito, nos hendenan den deporte ta sobresali tur caminda cu nos bay.

Grand Master Chaco Cornelio a logra masha hopi mes durante di su carera den e deporte di taekwondo, pa menciona nos tin nombra como Ridder in de Orde van Oranje Nassau, Hall of Fame y Referee Olimpico. Tambe Grandmaster Chaco Cornelio para dilanti su imagen den e Museo di Taekwondo na Muju, Sur Korea. Anja pasa December, Grand Master Jose Chaco Cornelio a anuncio su retiro como referee den e circuito internacional di taekwondo.

Lotto kier a manda un palabra di pabien na ex-presidente di ARTBO y referee internacional di taekwondo, Chaco Cornelio.

Chiara Petrocchi y Tiger Taekwondo cu nan medayanan conkista den e Costa Rica Open

Lotto ta felicita Chiara Petrocchi y Tiger Taekwondo cu nan medayanan conkista den e Costa Rica Open

Recientemente e scol di taekwondo, Tiger Taekwondo tabata na Costa Rica unda nan a competi den e Open Taekwondo Championship, un di e mas grandinan den e region di Centro America. Mester bisa cu e scol di tiger Taekwondo bou liderazgo di Teo Rodriguez a sa na haci un tremendo papel den e Open menciona unda nan a atletanan a logra conkista dos medaya di Oro y un medaya di Plata. E delegacion di Tiger Taekwondo a regresa bek Aruba satisfecho y lo sigui traha duro pa e siguiente competencianan cu nan tin plania. E hobennan Daniel Bolonoto medaya di Oro, Keylon Bislip medaya di Oro y Arien De Mey medaya di Plata a haci un tremendo papel den e torneo aki.

40778894_898224830374557_3355968715018469376_o.jpg

Ta bon pa menciona cu na banda di e medayanan conkista pa Tiger Taekwondo, e atleta femenino y alabes prospecto grandi na Aruba den taekwondo, esta Chiara Petrocchi a logra medaya di Oro pa Aruba na Costa Rica den su categoria Junior. E dos anja nan prome e hoben atleta Petrocchi a logra medaya di Brons y Plata.

Lotto semper a kere den e deporte di combate y sigur taekwondo cu sin duda ta un di e deprotenan na Aruba cu mas nan atletanan ta soobresali na nivel internacional. Awor un bes mas nan ta demostra cu nan ta presta y tene Aruba su number grandemente den exterior.

Lotto ta felicita Brazil Taekwondo Stichting cu e medaya conkista

6M7A9355.JPG

Lotto ta felicita Brazil Taekwondo Stichting cu e medaya conkista den e Costa Rica Open

Recientemente e medayista di Oro, Rasheed Lowe a regresa Aruba despues di un tremendo torneo den e Open Taekwondo Championship 2018 na Costa Rica. E hoben Lowe a logra medaya di Oro pa Aruba den e division Cadet ganando tur su peleanan y bringando un torneo sublime y cu determinacion. Rasheed pa hopi anja ta miembro di Stichting BrazilTaekwondo di Sr. Alberto Klaber. E hoben Lowe tabata masha contento cu su triunfo cu sigur no tabata facil mirando tur su peleanan. E la sigui persevera mirando cu cada bez e medaya di oro tabata mas cerca. Na final e la logra e medaya cu tanto e tabata anhela pero e mas principal, e la traha y entrena duro pa yega eynan. E ta masha contento y orguyoso di por a subi e podium cu e bandera di Aruba.

Director di Lotto cu tabata presenta pa ricibi e medayista Lowe a bisa di ta masha contento di por mira cu un bez mas e deporte di taekwondo ta sobresali y saca cara di Aruba den exterior. Segun Sr. Wernet e deporte di Taekwondo ta pone Aruba den “branding” internacional y pesey Lotto tin e compromiso cu deporte y sigur cu e deporte di taekwondo. No mester lubida cu deporte ta sano y ta kita nos muchanan foi caya, e ta produci ganadornan. Ban cuminsa traha hunto na bienestar di deporte, e unico manera pa Aruba sigui triunfa na nivel internacional.

Tres ekipo di taekwondo a biaha pa e Costa Rica Taekwondo Open

D5A_4183.jpg

Tres ekipo di taekwondo a biaha pa e di 11 edicion di e Costa Rica Taekwondo Open.

Diamars merdia, e tres scolnan di taekwondo, Brazil Taekwondo Stichting, Impact Taekwondo Aruba y Tiger Taekwondo a biaha pa San Jose, Costa Rica unda nan lo ta participando na e campeonato di taekwondo mas grandi di Centro America. E Costa Rica Taekwondo Championship ta premira di bira un grandisimo e anja aki atrobe y pa e motibo aki tambe varios atleta di Aruba lo forma parti di e magno evento di taekwondo. E atletanan cu lo midi forza den e XI Costa Rica Taekwondo Open ta Záhyon Klabér, Jourdé Klabér, Rasheed Lowe, Hakeem Lowe, tur di Brazil Taekwondo Stichting. Tambe nos tin e rumannan Nathan Fradl y Maelynn Fradl hunto cu Monica Pimentel di Impact Taekwondo Aruba y Nassip Bislip di Tiger Taekwondo. Pa su majan diaranzon a biaha e atleta Chiara Petrocchi.

Presente na airport nos por a mira presidente di Aruba Taekwondo Bond Dr. Guaicaipuro Jimenez hunto cu director di Fundacion Lotto pa Deporte, Di Stefano Wernet cu den presencia di famia, amigo y conocirnan a hiba palabra deseando henter e delegacion di taekwondo di Aruba tur clase di exito na Costa Rica.

Taekwodistanan femenino Chiara Petrocchi y Monica Pimentel lo competi den e Costa Rica

Taekwodistanan femenino Chiara Petrocchi y Monica Pimentel lo competi den e Costa Rica Taekwondo Championship 2018

Nos dos atletanan elite femenino di taekwondo Monica Pimentel y Chiara Petrocchi ta para pa un otro reto grandi unda fin di luna awor nan lo ta bringando den e Open Championship di Costa Rica cu ta un di e torneonan mas grandi di taekwondo den Centro America. E campeonato aki lo bira e di diez edicion di e Pan American Junior Kyorugi Championship y e Open di Costa Rica. Nos atletanan lo competi den diferente categoria, e atleta Chiara Petrocchi lo competi dos biaha esta den Junior cu ta e edad di 15 - 17 anja como tambe pa prome biaha den e categoria di adulto den e Open aki. E atleta Olimpico Monica Pimentel lo bringa den e categoria Open unda lo topa e mihonan den e competencia G1. Den pasado e atleta Chiara Petrocchi a logra medaya di plata y brons den e Costa Rica Open G1 como Junior.

Nos atletanan di taekwondo lo tin un schedule basta ocupa cu e diferente torneonan di clasificacion mirando cu tin e Weganan Panamericano Lima 2019 sigui pa e Weganan Olimpico Tokyo 2020. E atletanan lo wordo guia pa e coach nacional di taekwondo, Sr. Teofilo Rodriguez. 

Stichting Sportsubsidie Aruba a yuda subsidia e biahe di e atletanan elite di taekwondo, Monica Pimentel y Chiara Petrocchi ta pa Open Championship di Costa Rica.

Brazil Taekwondo Stichting a ricibi Zahyon y Jourde Klaber cu bay un gira den Europa

TKW (1).jpg

Bou guia di e ex-campeon mundial y sigur un ayudante grandi pa e taekwondo di Aruba, Sr. Henk Meyer e dos rumanan Zahyon y Jourde Klaber miembro di Brazil Taekwondo Stichting a bay den 6 pais na Europa unda nan a atende diferente campo di entrenamento y mas cu claro competencianan di nivel halto na Inglatera . Pa e dos atletanan sin duda esaki tabata un experencia super grandi unda nan a siña masha hopi mes durante e seis simannan cu nan a permanece na Europa. Paisnan bishita tabata Inglatera, Austria, Hulanda, Spaña, Belgica y Alemania.

Lotto, e loteria di Aruba semper cumpliendo cu nos atletanan ta un partner di e deporte di taekwondo tambe y ta masha orguyoso di por cumpli un bes mas cu e sonjo di nos atletanan.

"Awe ta un otro ehempel con Lotto pa Deporte tey pa deporte, tin e deporte na curazon, principalmente e deporte di taekwondo. Un bes mas nos por mira cu dos atleta di Brazil taekwondo a  bay hiba un preparacion debido den exterior pa asina nan por ta mas mihor prepara pa e G1 Open Taekwondo Championship di Costa Rica cu lo tuma lugar fin di augustus benidero. Pa varios aña e deporte di taekwondo di Aruba ta presta den bon forma internacionalmente. Esaki ta danki na e trabou duro cu e federacion y su presidente Dr. Guaicaipuro Jimenez a bin ta haci. E deporte di taekwondo ta uno di disciplina y respet cual ta dos aspecto masha importante pa e bon formacion di nos muchanan. Deporte ta engrandese amistad y union. Ban nos tur apoya nos muchanan y pabien pa bon preparacion. ", Sr. Di-Stefano Wernet di Lotto a bisa den su palabranan na e yegada di e delegacion. 

Na airport atletanan di e scol Brazil Taekwondo a wordo ricibi tambe pa Aruba Taekwondo Bond (ARTBO) y su presidente dr. Guaicaipuro Jimenez y demas atleta nan di e skol, famia y amigonan di e rumannan Klaber.