Ahedrez

Deporte di Ahedres lo continua cu su lesnan gratis den Bario

Ajedrez.JPG

Cu ayudo di SSA

Deporte di Ahedres lo continua cu su lesnan gratis den Bario.

Anja pasa e federacion di ahedres, a inicia cu un tremendo projecto yama ‘Ahedres ta bai den Bario’ unda muchanan interesa lo haya les di ahedres totalmente gratis. Muchanan den e edad di 6 – 12 anja cu ta bini di Traimerdia y Nos Atardicomo tambe esnan cu a inscirbi na Centro di Bario Lago Heights, Noord, Playa Pabao, Centro Deportivo Betico Croes y Biblioteca Nacional lo bini na remarke pa haya les di ahedres. Mester bisa cu e prome parti a bay super bon unda mas cu 200 mucha a sera conoci cu e deporte di ahedres, cual ta un cantidad record. Dialuna 14 di januari a inicia otro grupo y esaki lo tin un duración te cu den luna di april. E biaha aki lo reparti e muchanan den grupo di 6 – 8 aña y 9 – 12 aña pa hisa e efectividad di e lesnan. E lesnan lo ta bou encargo di e maestro internacional Lázaro Bueno Pérez di Cuba. E deporte di ahedres ta uno conocí pa engrandese y stimula e abilidad intelectual di e mucha.

Stichting Sportsubsidie Aruba ta contento di por aporta y brinda e ayudo necesario na e federacion di ahedres cu nan tremendo actividad “Ahedres den Bario”. Stichting Sportsubsidie Aruba lo sigui sostene e bunita projecto aki.

Federacion di ahedres ta entrega e premionan maximo

47258817_943886415808398_2380241111319838720_o.jpg

Federacion di ahedres ta entrega e premionan maximo na e ganadornan den e campeonato Hubenil di Dammen.

Diadomingo atardi, a tuma lugar e entregamento di premio na ganadornan di Campeonato Hubenil di dammen pa anja 2018. E deporte di dam y ahedres ta restora bou di un solo federacion. E torneo di dammen a wordo hunga den 2 categoria esta U-12 y U-18 unda cu despues di un bon bataya e ganadornan di 2018 a bira conoci. Den categoría U-12, e hoben Neider Silva a bira e campeon absoluto. E hoben Neider a score 10 punto, perdiendo 1 solo partido mientras na di 2  y 3 lugar, tabata tin un empate entre Jose Miguel Bueno y Devin Davelaar, ambos a score 5 punto. Despues di weganan extra, Jose Miguel Bueno a keda na di dos lugar y Devin Davelaar na di tres lugar.

Den categoría U-18 a bira campeón e hoben Alan P Suarez cu ta gana tur su weganan.

E di dos lugar a bay pa su ruman Angel R. Suarez. E hoben aki a perde 1 wega, tabla 1, y a gana 3 wega, na di tres lugar a keda Patrick Williams. Patrick a score 6 punto ( 1 perdi, 2 tabla y 2 gana).

E directiva di dicho federacion a haci entrega di e premionan na e respectivo ganadornan. Den 2019 ta spera mas participacion den e deporte di dammen sigur serca nos hobennan unda cu lo cuminsa promove e deporte den nos scolnan basico y avansa na Aruba.

Stichting Sportsubsidie Aruba ta contento di por aporta y brinda e ayudo necesario na e federacion di ahedres/dam pa cu nan campeonato 2018. Stichting Sportsubsidie Aruba a yuda subsidia e campeonato di dammen 2018.

Alvin Howell y Daniel Diaz lo competi den e Campeonato Panamericano Amateur di ahedres

Daniel-Diaz-y-Alvin-Howell.jpg

Recientemente dos atleta di ahedres a biaha pa e ciudad di Panama City unda nan lo competi den e Campeonato Panamericano Amateur den e deporte di ahedres. E campeonato na Panamericano Amateur lo wordo hunga den 3 categoria unda e dos hungadornan representando Aruba esta Alvin Howell y Daniel Diaz di Aruba lo participa den e categoría Sub-1700. Diahuebs ya e inicia cu e prome rondanan mientras e diamars awor dia 6 di november e torneo lo clausura cu e entrega di premio.

E deporte di ahedres tambe e conoce un crecimento durante e anjanan cu a transcuri, e oportunidad pa competi na nivel regional, continental y mundial a presenta mientras nos atletanan ta resalta logrando premio. Den 2018, Aruba su delegacion hubenil a san a gana varios premio den e Carifta Chess Championship na Surnam. Dos siman atras. Aruba a logra un bon papel den e torneo internacional di ahedres “Aruba Chess Challenge 2018” unda e hobencita Thamara Sagastegui a triunfa den e categorianan U12 y U18. Asina nos por mira cu e deporte mental no solamente ta yuda nos hobennan den nan pensamento pero tambe nos ta logrando premio den exterior.

Lotto, e loteria di Aruba pa medio di Stichting Sportsubsidie Aruba a yuda subsidia e biahe di e hungadornan Alvin Howell y Daniel Diaz pa e Campeonato Panamericano Amateur di ahedres na Panama.

Aruba a logra un bon papel den e torneo internacional di ahedres

Aruba a logra un bon papel den e torneo internacional di ahedres “Aruba Chess Challenge 2018”

Siman pasa Aruba tabata anfitrion di e torneo anual di ahedres, Aruba Chess Challenge 2018. Ya pa varios anja e federacion di ahedres ta organisa dicho torneo cu ta conta cu un elenco internacional renombra den nos region. E torneo tabata tin un duración di 4 dia y a tuma lugar den e edificio di Simar na Sabana Blanco. E aña aki e torneo a wordo hunga den 3 grupo cual tabata U12, U18 y Open. Mester bisa cu tur aña e Aruba Chess Challange ta conoce participacion internacional. E biaha aki esaki no tabata diferente unda hungadornan di e pais Surnam, Venezuela, y hasta Russia a bini Aruba y participa na e torneo aki. Un total di 42 participante a competi di e Aruba Chess Challange 2018.

Pa loke ta e prestacion di nos hungadornan local mester bisa cu e hobencita Thamara Sagastegui a triunfa den e categorianan U12 y U18 unda e ta logra un prome lugar, unda un total di 26 hungador a competi. Sin duda esaki tabata un tremendo logro di e hobencita Sagastegui. Na banda di e logro di Tamara, tabata tin mas hungador a resalta manera Nathan Croes cu a gana e premio pa e mihor hungador bou di 16 aña, mientras Juan Keanu Vrolijk a logra e premio pa e mihor hungador bou di 14 aña. Den e categoría Open, Jose (Chelo) Pesqueira a caba na di 4 lugar y Brian Diaz a termina na di cinco lugar. E premio pa e hungador local cu a presta mihor a bay pa Jose (Chelo) Pesqueira. E prome lugar den Open a bay pa e Rusiano, Vitaliy Kiselev cu a gana tur su weganan hunga. Pabien na tur e ganadornan.

Lotto, e loteria di Aruba pa medio di Stichting Sportsubsidie Aruba a yuda subsidia e torneo anual di ahedres, Aruba Chess Challenge 2018 organisa pa e federacion di ahedres Arubano.

Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.

Proyecto ‘Ahedrez ta bay Bario’

FB_IMG_1505047814347-768x856.jpg

Stichting Sportsubsidie Aruba y Lotto contento di por contribui cu e proyecto ‘Ahedrez ta bay Bario’.

Recientemente e federacion di Ahedrez hunto cu Traimerdia a anuncia cu lo cuminsa cu un projecto super beneficioso pa nos muchanan na Aruba y sigur pa nos barionan. Projecto ‘Ahedrez ta bai den Bario’ lo start sali dia 1 di october proximo den e diferente centro di barionan na Aruba. Un proyecto cu lo yuda stimula e mucha den su pensamento, strategia y tur otro cosnan bon cu esaki sigur lo trece cune. E les lo ta pa muchanan di 6 – 12 aña di edad. E localidadnan di Traimerdia lo wordo uza pa lesnan di ahedrez. Esakinan lo ta completamente gratis. Mester bisa cu specialmente pa e entrenamentonan lo trece un experto di ahedrez for di Cuba pa un periodo di 3 luna. Pa mas informacion por yama e numbernan 594-5590/594-1351 of por Email: arubachess@gmail.com . Mas informacion over di e proyecto por wordo haña riba e site di e federacion (www.arubachess.com)

Stichting Sportsubsidie Aruba y Lotto a yuda subsidia e e proyecto ‘Ahedrez ta bay Bario’ organiza pa e federacion di ahedrez di Aruba.

Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.

Delegacion di ahedrez lo participa den e Festival Panamercano di Ahedrez

Schaken.jpg

Delegacion di ahedrez lo participa den e Festival Panamercano di Ahedrez na Santiago de Chile

Oranjestad, Aruba 8 di juli 2018. E aña aki un bes mas e Federacion di ahedres di Aruba a ricibi un invitacion di e Federacion Deportiva Nacional Ajedrez Federado de Chile pa participa den e Festival Panamericano Hubenil di Ahedres cu e biaha aki lo tuma lugar e dianan 21 pa 29 di juli proximo den e ciudad di Santiago capital di e pais Chile. E torneo aki lo wordo hunga den e categorianan U8, U10, U12, U14, U16, U18 Open y Mucha Muher. Nos muchanan lo competi den diferente categoria di U8 te cu U18.

E federacion di ahedres a manda un delegacion fuerte cu lo representa Aruba den e torneo aki. E delegacion lo consisti di e atletanan Sylvi Cabral den U8 mucha muher, Thamara Sagastegui den U12 mucha muher, Lesie Ielo den U14 mucha muher, Kyell Jean Antonio den U14 Open y Eldrick Donata den U18 Open. E lider di delegacion lo ta Sheila van Veen mientras como capitan y coach lo fungi Jose Sequera. 

Ta bon pa menciona cu nos atletanan hubenil di ahedrez ta basta activo na nivel internacional mirando cu e anja aki un delegacion a competi den e 7th CARIFTA JUNIOR Chess Championship 2018 na Surnam mientras cu e hoben Ilya Stetsenko a representa ahedrez di Aruba den e Campeonato Continental Absoluto na Montevideo, Uruguay. Na banda di e participacion, e federacion a busca un entrenador profesional di Venezuela den persona di coach Jose Sequera pa asina yuda den e bon desaroyo di nos atletanan di ahedres.

Danki na donacion di Lotto, e Loteria di Aruba, Stichting Sportsubsidie Aruba a yuda subsidia e biahe di dos atleta mas un miembro di delegacion y algun gasto adicional di e delegacion di ahedres cu lo competi den e Festival Panameericano di Ahedres na Santiago de Chile. Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.

 

Ilya Stetsenko lo representa ahedrez di den e Campeonato Continental Absoluto na Uruguay

FB_IMG_1505047814347-768x856.jpg

Cu ayudo di St. Sportsubsidie Aruba.

Ilya Stetsenko lo representa ahedrez di den e Campeonato Continental Absoluto na Uruguay.

E dianan 31 di mei pa 10 di juni proximo, e hoben atleta prospecto den e deporte di ahedrez, Ilya Stetsenko lo representa Aruba den e Campeonato Continental Absoluto de las Americas cu e aña aki lo tuma lugar na Montevideo, Uruguay. E campeonato di ahedrez aki ta conoci como un di esnan mas grandi den nos continente y den pasado varios biaha Aruba a participa na esaki. E promer rond lo start diabierna dia 1 di Juni mientras e ultimo buelta lo wordo hunga dia 10 di Juni. Mester bisa cu na e campeonato di ahedrez aki, e miho atletanan di henter e continente America lo ta presente y pesey mes tambe a otorga Aruba un cupo pa participa na e campeonato di taya cu lo conta cu alrededor di 120 participante. Pa e hoben Ilya Stetsenko esaki sin duda lo bira un experencia unico unda e lo enfrenta e mihonan.

Nos atletanan di ahedrez ta conoci pa presta bon internacionalmente. Recientemente un delegacion di Aruba a competi den e 7th Carfita Junior Chess Championship 2018 na Surnam unda nos atletanan a hasi un tremendo papel. Dos anja pasa Aruba a logra un di dos lugar overall den e Carifta na St. Croix triunfando cu 7 medaya y 4 trofeo overall.

Stichting Sportsubsidie Aruba a subsidia e biahe di e atleta Ilya Stetsenko pa Campeonato Continental Absoluto di ahedrez na Uruguay.

Brian Diaz cu a bira e Nacional Master di Aruba despues di a triunfa den e Campeonato Nacional di Ahedres

IMG_5901.JPG

Durante di e dos fin di simannan tras di lomba e federacion Arubano di Aherdres a tene nan di tres edicion di e Campeonato Nacional di Ahedres cu a conta cu participacion di 10 atleta cu a varia den tur edad, esaki den e edificio di APFA na Sero Blanco. E atletanan Jose (Chelo) Pesqueira, Octavio Croes, Angelo Franken, Brian Diaz, Hubert (Randy) Tromp, Enrique Jacopucci, Daniel E. Diaz, Ethan Croeze, Ilya Stetsenko y Alvin Howell a wordo selecta y a participa a base di invitacion.

Despues di dos fin di siman di tremendo weganan di ahedres por bisa cu e hoben Brian Diaz y e ya veterano Chelo Pesqueira a keda empata na prome lugar, pero mirando e mas punto di SB pa e hoben Diaz esaki a bira oficialmente e ganador maximo di e campeonato nacional. Notabel ta cu logrando e titulo aki, Brian Diaz a haya e apodo Nacional Master di Aruba. Na di dos lugar a termina Jose (Chelo) Pesqueira, na di tres lugar Hubert Tromp y na di 4 lugar e veterano Octavio Croes.

Ta bon pa remarka cu e deporte di ahedres ta bayendo super bon pa loke ta e desaroyo. Esaki ta danki na e federacion cu ta activo y ta percura pa un bon structura y plan pa e deporte mental. Recientemente un delegacion grandi a baiha pa Surnam unda nos muchanan a duna un bes mas un tremendo bataya. Tambe siman pasa den e galardon Premio Excelencia den Deporte varios atleta den diferente categoria a keda nomina pa e premio miho atleta di aña 2017.

Stichting Sportsubsidie Aruba cu a subsidia e campeonato di Nacional di Ahedres ta contento cu un bez mas por a aporta na e deporte mental cu ta traha futuro campeonnan den nos deporte local.