Federacion di tennis di mesa a tene nan torneo di ranking

5b6ea843-acb2-4cd7-9a34-66edd61af3c1.jpg

E sistema di ranking ta uno hopi importante pa e federacion di tennis di mesa, esta Aruba Table Tennis Association unda hungadornan tin cu lucha cada torneo pa keda halto den puntuacion y posicion pa asina e representacion den exterior por ta mas cu bisto na fabor di esnan cu ta sobresali. Den e ultimo añanan por a ripara cu esaki a yuda masha hopi unda e atletanan ta hasi nan maximo esfuerso pa matene of mehora nan nivel pa asina duna un miho bataya na nan contrincantenan mas sercano pa a lo largo bira e number uno den nan categoria. E competencia aki sin duda ta uno sano y e mayoria ta haya e oportunidad pa midi nan nivel den exterior esaki den torneonan renombra den region y continente. Aruba Table Tennis Association lo sigui hasi nan maximo esfuerso pa cumpli cu nan atletanan organisando torneonan individual y team esaki tanto na Santa Cruz y San Nicolas.

E torneo di ranking ta cana segun schedule unda nos a haya den e categoria U-18 un prome lugar ta wordo ocupa pa Jeandry Mathilda, e di dos lugar pa Chingho Chung y e di tres lugar pa Johnatan Paredes. Den e categoria A Klas, Mario Lobo a keda na prome lugar mientras Andy Gomes a keda na di dos lugar y Jeandry Mathilda a keda na di tres lugar. Den e categoria B Klas, nos ta haya na prome lugar James Letren, na di dos lugar a keda Franklin Lopes mientras na di tres lugar a termina Wing Chow Leong.

Mester bisa cu e ranking ta e penultimo torneo di aña. Otro siman lo inicia e torneo di mas importante di aña pa clausura e temporada 2018 di tennis di mesa ora cu e hungadornan lo bataya pa e premio maximo den e Copa Aruba.

Stichting Sportsubsidie Aruba ta contento di por aporta y brinda e ayudo necesario na e federacion di tennis di mesa pa cu nan campeonato di ranking 2018. Stichting Sportsubsidie Aruba a yuda subsidia e campeonato di tennis di mesa den su totalidad.