Royal Power cu nan di 8 titulo di campeon

Lotto ta felicita Royal Power cu nan di 8 titulo di campeon den Copa Noord.

E grandioso Copa Noord 2018 den e deporte di softball a yega su gran final diadomingo ultimo ora cu e campeonnan indiscutibel Royal Power a logra nan di 8 titulo di Copa Noord. Despues cu diasabra a derota e ekipo invicto den e torneo esta Calabas Blue Jays cu e score di 10 - 4 e faboritismo a bira grandi pa su diadomingo den e wega di final contra di Kudawecha Indians. Aki Royal Power no a laga niun duda atras y ta bin gana e encuentro final pa asina titula campeon un bes mas.

E organisadornan Tanki Leendert Giants sin duda por mira tras di un exitoso 6 siman di e Copa Noord 2018. Asina tambe e di 21 edicion di e Copa Noord ta tras di lomba. Un total di 8 team a bataya e aña aki pa e titulo maximo den e torneo di softball mas popular riba nos isla.

Lotto pa Deporte cu tabata un di e patrosinadornan  di e torneo di Copa Noord 2018 ta masha contento di por a contribui na un otro evento deportivo exitoso. Lo tey pa yuda tur deporte, sigur e deporte di softball. Deporte ta trece amistad, union y paz. Sigui cumpra bo Lotto y sostene nos deportistanan Arubano.

Un palabra di pabien ta bay na Royal Power cu nan titulo di campeon y Kudawecha Redskins cu nan titulo di sub-campeon. Mas cu claro kier a felicita e organisacion di Tanki Leendert Giants cu a sa di organisa e tremendo torneo di softball Copa Noord 2018.