Back to All Events

Shipreke y su show humoristico


Na caminda pa celebracion di 40 aña den farandula.

Pa medio di e comunicado aki, nos ta haci un invitacion special na henter e pueblo di Aruba, pa bin presencia e tremendo show di nos artista local y comediante; sra Lilian Besselink, miho conoci como Shipreke, kende e luna pasa den e temporada di vacantie grandi a sa di yena un sala ful y completo na Scol di Arte na San Nicolas.

Na peticion di publico en general y di tur sostenedor y fanatico, lo tene un funcion mas y esaki lo tuma lugar na Trappers Club na Santa Cruz cuminsando pa 9:00pm te cu 2:00 di madruga.

Durante di su espectaculo lo por spera hopi sorpresa manera semper, e. o. lo conta cu participacion di artistanan invitado special, musica, canto, baile, comedia, arte di palabra, dicho y proverbio, chasconan y escenanan humoristico y hopi mas. E. o. lo tin musica cultural y crioyo di nos grupona local manera: Tipico Alegre Cadushi Largo, Badu, Caha di Orgel “El Maldito” Dj Balashi.

Bin celebra hunto cu “Shi Preke”, su locuranan genial y su fecha di cumpleaños, den un show exitoso: Na caminda pa e 40 aña den farandula. Bini un, bini tur diasabra awor, dia 10 di september. Mira pa boso no perd’e. Desde awo masha pabien na sra. Lilian Besselink, ‘Shi Preke’ pa su cumpleaños y su show exitoso. Pa mas informacion por tuma contacto libremente na number 564-0514.


Tel: 297 564 0514

Earlier Event: September 9
"Jani Brokke Memorial 2016" Volleyball 60+
Later Event: September 11
Duathlon Nacional 2016