Back to All Events

Careda di 1, 2 y 3 Km

Nos ta yegando na final di aña escolar 2016 y tambe na final di tur competencia di ‘Deporte Escolar’ organisa pa IBiSA.Den luna di juni ta tuma lugar e ultimo competencia escolar cu tin riba calendario. Ta trata aki di e careda di 1, 2 y 3 kilometer pa mucha di scolnan di Enseñansa Basico.

IBiSA ta uni cu Comite Olimpico Arubano pa organisa e careda di 1, 2 y 3 kilometer escolar pa cuminsa celebra e “World Olympic Day 2016” cu ta dia 23 di juni 2016. E careda di 1, 2 y 3 Km ta tuma lugar riba diasabra dia 18 di juni 2016 na Bucuti net dilanti entrada di Varadero. Tur mucha cu participa n’e careda ta bay ricibi un bunita t-shirt di “World Olympic Day” y tambe un ‘bracelet’ como recuerdo.

Inscripcion pa Careda 1, 2 y 3 Km:
Inscripcion p’e careda di 1, 2 y 3 kilometer pa muchanan MESTER bay via di e scol basico cu e mucha ta atende. Tur informacion y formulario di inscripcion ta obtenibel caba na tur scol. IBiSA ta pidi mayornan pa busca e informacion na scol di bo yiu y laga e mucha inscribi mas pronto cu ta posibel na su scol. ULTIMO DIA cu scolnan por inscribi participacion di nan alumno ta riba diahuebs, dia 9 di juni 2016. E diasabra mainta, dia 18 di juni no ta tuma inscripcion.

Pa participa n’e careda di 1 Km e mucha mester ta naci na aña 2007 y mas jong, pa categoria A. P’e careda di 2 Km e mucha mester ta naci na aña 2005 – 2006, pa categoria B. Y p’e careda di 3 Km e mucha mester ta naci na aña 2003 – 2004, pa categoria C. Premiacion ta sigui mes mainta despues di e careda y ta duna medaya na e prome 3 lugar den cada categoria di edad pa tanto mucha muher y mucha homber. Riba mainta di e careda ta tuma registracion entre 8:00 a.m. y 9:00 a.m. y e caredanan ta cuminsa mesora despues. Polis ta cera e caminda, p’esey IBiSA ta pidi mayornan pa bin trempan.

Si mester mas informacion, por tuma contacto cu sr. Giovanni Hoek na IBiSA, telefoon 582-4987 of via email: Switberti. Hoek@aruba.gov.aw.

Ban participa hunto cu IBiSA y Comite Olimpico Arubano y apoya nos muchanan den nan careda di 1, 2 y 3 kilometer y asina clausura exitosamente e calendario di actividad y competencia di Deporte Escolar 2016, como tambe celebra “World Olympic Day”.


Earlier Event: June 18
Fun Walk
Later Event: June 18
Feria Nacional