Back to All Events

Dia Internacional di Museo 2016

Pa diferente aña caba e comunidad mundial di museo ta celebra “Dia Internacional di Museo” rond di e fecha di 18 di Mei. Cada aña e Conseho Internacional di Museo (ICOM) di Nacionnan Uni ta bin cu un tema special pa pone enfasis riba e posicion importante cu museonan tin den nos comunidad. Pa 2016 ICOM a scoge e tema di “Museo y Paisahe Cultural” (Museums & Cultural Landscapes), cual tambe lo ta e tema oficial di e Conferencia General di ICOM pa 2016. En conexion cu celebracion di Dia Internacional di Museo, ta ofrece publico riba Diadomingo awor di 12’or pa 1’or di merdia na Museo Arqueologico Nacional Aruba (MANA), un presentacion duna pa drs. Raymundo Dijkhoff tocante e sitio arqueologico di St. Cruz 35.

E meta principal pa a institui e Dia Internacional di Museo ta pa reconoce e hecho cu museonan ta un medio importante den e intercambio cultural di un pais, unda cu museonan ta enriquece e cultura local y ta stimula respet mutuo entre diferente culturanan. Tambe un museo ta percura pa desaroyo di e comunidad, creando asina comprension, cooperacion y union entre nacionnan. Durante e ultimo añanan, e participacion na e Dia Internacional di Museo a crece grandemente. Asina aña pasa mas di 30.000 museo rond di mundo a participa na e esaki cu e tema di sostenibibilad. MANA a ofrece den cuadro di esaki aña pasa diferente actividad pa publico enfocando riba e.o. e importancia di e “Trankera” di cadushi. Riba diferente dianan nacional mucha y hoben por a pinta y decora un “Trankera” na Museo cu e.o. materialnan recicla y den vakantie di Pasco grandi, conhunto cu Parke Nacional a ofrece un workshop di “Raton di Anochi”

Segun e definicion di e Comite pa Patrimonio Mundial di Nacionnan Uni, un paisahe cultural ta e elemento cultural cu ta ser representa den tanto e material cu a ser crea pa e ser humano, como tambe e material cu a ser crea door di naturalesa. Pues aki por trata di un paisahe crea intencionalmente door di un persona, pero tambe un paisahe cu ta existi como resultado di e proceso di evolucion. Hopi biaha e paisahe cultural tin un asociacion religioso y artistico, banda di e elementonan natural.

Na Aruba sigur tambe nos conoce e paisahe cultural. Asina nos tabatin e “Natural Bridge”, tambe conoci como e sitio Boc’i Brik, di cual MANA algun aña pasa tabata tin un exposicion temporario pa publico, pero tambe “Ser’i Noca”, “Ayo y Casibari Rock formations”, como tambe nos cuebanan den Parke Nacional Arikok.

Pa Museo Arqueologico Nacional Aruba e tema di Paisahe Cultural ta mas importante ainda, ya cu e material arqueologico hopi biaha ta den relacion cu e elementonan natural. Asina por nota cu e manera di biba di e Amerindio ta trata di un combinacion di naturaleza cu e influencia di e ser humano, lagando asina un imprenta permanente di e relacion cu tabata existi entre e poblacion y su habitat natural. Muestra di esaki no ta solamente e dibuhonan riba baranca cu e Amerindionan a laga atras, sino tambe e kemaduranan di nan casuela unda nan tabata bida, como tambe e monton di cocolishi, e asina yama ‘shell-midden’, na unda nan tabata colecta bestia di cocolishi . Tambe tin algun sitio na Aruba (p.e. den e cuebanan) cu ta refleha un uso particular di e ser humano cu un sitio specifico den naturaleza, sea cu ta(-bata) pa actividad spiritual of ceremonial.

Como reconocemiento di e variacion grandi di e interaccion entre e ser humano y su medio ambiente, mester bin cu mihor proteccion di e herencia cultural aki. E paisahe cultural no ta trata solamente e aspecto cultural di tradicion bibo, pero tambe restonan di nos antepasadonan. P’esey mester bin cu legislacion adequa cu ta protehe nos herencia cultural arqueológico y nos sitionan natural-historico specifico, p’asina futuro generacionnan tambe por sa mas di nos historia y nos identidad cultural.

Den e cuadro aki y den conexion cu Dia Internacional di Museo 2016, Museo Arqueologico ta ofrece Diadomingo awor di 12 - 1 pm un bes mas e presentacion di arqueologo drs. Raymundo Dijkhoff tocante e santanan histórico na St. Cruz 35. E biaha aki drs. Dijkhoff lo amplia un poco mas riba esaki. Pues no perde e oportunidad aki y bishita Museo entre 10 am pa 2 pm y haci uso di e oportunidad pa presencia e charla di St. Cruz 35 y haci tur bo preguntanan na e arqueologo mes. Museo Arqueologico ta felicita tur Museo y personal di Museonan riba Dia Internacional di Museo.


 
Earlier Event: May 21
Caminata den Rooi Juditi
Later Event: May 24
Arubiana/Caribiana Charla